Furðuleg villa í Furðulegu háttalagi

Ég hef rekist á nokkra galla í Furðulegu háttalagi hunds um nótt, hver um sig afsakanlegur, en einn er áberandi verstur. Svo virðist vera að sögumaður bókarinnar átti sig ekki almennilega á því hvað hann er gamall, sem væri gjörsamlega fáránlegt, svo sökin liggur annaðhvort hjá þýðanda eða rithöfundi, sem er þó eiginlega ennþá fáránlegra. Varla getur lesandinn ályktað að rithöfundur hafi gleymt aldri aðalpersónunnar í miðjum klíðum, en hvernig getur hann ályktað öðruvísi þegar sönnunin liggur fyrir framan nefið á honum:

Setning 1: Fyrir átta árum, þegar ég hitti Siobhan í fyrsta skipti, sýndi hún mér þessa mynd.

Setning 2: Ég er fimmtán ára og þriggja mánaða og tveggja daga.

Setning 3: Hún [Siobhan] byrjaði ekki að vinna í skólanum fyrr en ég varð tólf ára.

Einfalt reikningsdæmi: 7 = 15 – 8 ≠ 12.

Fimm mögulegar lausnir:

1. Hann hlýtur að hafa verið sjö ára þegar hún byrjaði að vinna í skólanum, því lesandinn gerir ekki ráð fyrir því að hann hafi þekkt hana áður. Sögumaður gefur svo ítarlegar upplýsingar að hann hefði áreiðanlega minnst á það hafi hann þekkt hana áður en hún byrjaði að vinna í skólanum.

2. Hann laug því að hann er fimmtán ára. Í raun er hann tvítugur. Þetta er óhugsandi því hann getur ekki logið, eðli sínu samkvæmt.

3. Höfundurinn klúðraði. Það er dauðasynd.

4. Þýðandinn klúðraði. Einnig dauðasynd.

5. Í raun er þetta stærðfræðidæmi sem aðeins hinir snjöllustu rökfræðingar gætu leyst.