Ef gerð yrði bylting öreiga á Íslandi, ætli þeir myndu gera pásu á átökunum til að horfa á Ædolið? Myndi ríkissáttasemjari svo skerast í leikinn og gera við þá nýjan kjarasamning? Myndi svo Kastljósið fá til sín húsmæður úr vesturbænum að röfla um enn eitt djöfulsins verkfallið og óþolandi stéttir sem hugsa bara um peninga? Myndi þá öreigastéttin gera aðra pásu á átökunum til að fara heim og horfa á Kastljósið? Myndu Samfylkingaröreigar hætta við stéttabaráttu ef hún fengi ekki nógu mikið fylgi í skoðanakönnunum?
Day: 8. desember, 2005
Tilvitnun gærdagsins
Ég: Og Seðlabankastjórinn, hann kom fram í fréttum í gær og sagði að fyrst hefði bankinn hækkað stýrivexti um 0,75%, þvínæst 0,25%, og þar af leiðandi hefði Seðlabankinn hækkað stýrivexti um samanlagt 1%! Kann maðurinn ekki að fara með prósentur?
Amma: Já, piff, ég held þessi Davíð Oddsson sé ekki alminlegur.
Haustdraumur á Krít
Í nótt dreymdi mig að ég hefði farið til Krítar. Þar stóðum við nokkur á svölunum á íbúðinni okkar og ríghéldum okkur í rimlahandriðið svo við myndum ekki fjúka út í buskann í fellibylnum sem þar gekk yfir. Eldingar sprungu á hafinu í fjarska. Já, það er sama veðrið á Krít og á Íslandi, hrópaði ég viturlega gegnum storminn. Munurinn liggur helst í því að á sumrin er öllu heitara á Krít, en á Íslandi breytist það ekkert. Það mun hafa verið haust á Krít í þeim draumi.
Svo vaknaði ég við að vindurinn gekk í bylgjum inn gluggann hjá mér í samfloti við rigninguna. Nei, hver djöfullinn! Ég lokaði glugganum. Það gagnast manni lítið að ferðast þegar það er sama djöfuls veðrið alstaðar í heiminum.
Afmæli og ljóð
Á þessum degi fyrir 25 árum fæddist bróðir minn eldri. Nákvæmlega sama dag var John Lennon myrtur af náunga að nafni Mark David Chapman. Sá síðarnefndi hefur enn ekki fengið reynslulausn þrátt fyrir margar beiðnir.
Í tilefni dagsins væri ef til vill rétt að birta hér einhverja fyndna sögu af bróður mínum. Ég geri það kannski á eftir.
Í tilefni dagsins væri ef til vill rétt að birta hér einhverja fyndna sögu af bróður mínum. Ég geri það kannski á eftir.
Í gær keypti ég mér ljóðabækurnar Blandarabrandara eftir Eirík Örn Norðdahl og Staka jaka eftir Árna Larsson.
Mér fannst Blandarabrandarar illlæsileg á köflum, en ég fann oftast merkingu í ljóðunum. Hugmyndin að baki þessari bók er að taka eldri texta, hræra þá saman svo upphaflega samhengið finnist ekki, og birta aftur í brenglaðri uppröðun. Sjálfur hef ég tekið þátt í sams konar tilraun með forritinu hans Jóns Arnar, DADDA (áreiðanlega kennt við dadaisma). Áreiðanlega hefur þetta verið gert mun oftar. Í heildina litið er þetta bók sem býður öðrum ljóðabókum fremur upp á nýja túlkun í hvert sinn sem hún er lesin. Að sama skapi verður lesturinn aldrei eins eftirminnilegur.
Stakir jakar eftir Árna Larsson er stórfyndin á köflum, sumpart torskilin. Í henni má finna ádeilu á stríðsrekstur og neyslusamfélag nútímans, og Árni leikur sér að orðunum til að veita þeim tvöfalda, stundum þrefalda merkingu. Oftast heppnast það ágætlega, en ekki alltaf. Í heildina séð er bókin fín. Ljóð dagsins er úr Stökum jökum og er sérstaklega fyndið okkur fyrrverandi nemendum hans:
Graffiti del maestro
löngu hættur
að leiðrétta stíla
laumast stundum út á planið
og rispa með stofulykli
í bónfægða lakk
húðina
á bílum
nemenda minna
algengar
villur