Talandi um banka, þá er hér ókeypis hugmynd: Að þjónustuver banka og kreditkortafyrirtækja bjóði ferðalöngum erlendis upp á þjónustu gegnum skype. Nema fjármálafyrirtækin eigi í samráði við fjarskiptafyrirtækin um að gera það ekki, þá myndi ég skilja hvers vegna þeim þætti það ófýsilegur kostur.
Day: 19. febrúar, 2008
Bankinn
Í gær hringdi ég í bankann og bað um hærri yfirdrátt. Eftir vinnu kom ég svo við á bensínstöð, en tortrygginn að vanda reyndi ég fyrst heimildina áður en ég dældi. Eins gott líka.
Í dag hringdi ég í bankann og ítrekaði beiðnina. Mér var sagt hún væri komin. Eftir lokun bankans að sjálfsögðu dröslaði ég mér í búðina. Engin heimild.
Á morgun fer ég í bankann.
Kall náttúrunnar
Á dögunum kom faðir minn að stærðarloðinbarði inni í svefnherbergi sínu, og lýsti því yfir sigri hrósandi að dyrnar hefðu verið lokaðar og þar af leiðandi hefði enginn getnaður átt sér stað við heimasætuna. Ég útskýrði mökunaraðferðir katta fyrir karli föður og kvað kisu fullgamla fyrir slíkan gjörning, hún mætti best vita það sjálf hvað riði henni að fullu.
Það var áður en ég uppgötvaði að hún hefur verið að dreifa ferómóni eins og sælgæti um svalirnar, eins og köttur sleginn úr tunnu. Mér varð nefnilega litið upp frá skrifborðinu mínu áðan og sá rauðlitaða skepnu taka viðbragð við gluggann og stökkva á brott við að sjá mig. Samtímis kemur mín trítlandi að glugganum og leitar leiða út.
Ég er talsvert spúkaður.