Portkonur og kröfuspjöld

Eitt sinn villtumst við bróðir minn á hóruhús í Verona fyrir algjöra tilviljun. Við komumst svo að því, þegar við fórum að segja fólki söguna, að enginn trúði því að við hefðum villst þangað.

Ég hef verið með Internationalinn á heilanum alveg síðan Skúli raulaði hann fyrr í dag. Þá varð mér skyndilega hugsað til kröfuspjalds sem ég sá eitt sinn á fyrsta maí. Á því stóð: Færri kröfuspjöld.

Lærdómur

Þessa helgi eyddi ég um sautján klukkustundum í heimalærdóm. Það sem ég afrekaði þessa helgi verður ekki endurtekið. Svo fékk ég niðurstöður úr prófi úr fyrstu fimm köflum Lord of the Flies um daginn: 7,5. Ég las aðeins helminginn af námsefninu og telst þetta því vera 150% skilvirkni. Það er ekki amalegur árangur.

Hálfvitaorðan

Ég hefi ákveðið að stofna Hálfvitaorðuna, dótturverðlaun Peningaorðu Stefáns Einars „púnkturkomm“ Stefánssonar, sem ég veiti þeim aðilum sem ég tel vel að henni komna hverju sinni og verður hún heiðursmerki þessarar síðu. Hún skiptist í þrjú stig:

Hálfvitaorða
Hálfvitaorða með gullasna
Stórhálfvitaorða

Það fer eftir afrekum viðkomandi hvaða stig orðunnar er veitt en sá sem eitt sinn hlýtur orðuna getur hlotið hana aftur og þá jafnvel af hærra stigi ef það er talið viðeigandi. Hægt er að koma tillögum um orðuveitingar á framfæri við síðuna á póstfanginu mínu. Hér á eftir er listi þess fólks eða hópa fólks sem hlotið hafa hina efirsóttu orðu.

30.01.05
Stefán Einar Stefánsson (Stórhálfvitaorða)
Gísli Marteinn Baldursson (Hálfvitaorða með gullasna)

Ástandið

Æskan er að fara í vaskinn. Þúsundir uppdópaðra amfetamínbarna stara á skjáinn í leit að lífsfyllingu meðan foreldrarnir vinna fyrir nýrri álmu á húsið. Gegnum skerminn kemst æskan að þeirri niðurstöðu að Sálin hans Jóns míns sé góð hljómsveit og að vert sé að eyða fjármunum í þá manneskju sem best getur hermt eftir henni. Til að skera úr um það fljóta tugir þúsunda smáskeyta eftir öldum örbylgjanna gegnum nýbeislaða tækni heilaskaddandi farsíma. Fannst ykkur það slæmt á stríðsárunum? Það var ekkert í samanburði við hið nýja ástand.

Össur og Sus

Ekki hyggst ég gera eins og einhver gerði á glænýja blogginu hans Össurar Skarphéðinssonar, að kalla hann fífl á sínu eigin athugasemdakerfi. Nei, það gæti ég gert á minni eigin síðu, hefði ég hug á því. Hinsvegar þykir mér aðdáunarvert af honum að þora að hafa athugasemdakerfi, einmitt af þessari ástæðu.
Annars tók ég eftir því um daginn að litlu djöflarnir í Sus hafa fylgst með blogginu mínu. Það gerðist í kjölfar þess að ég tengdi á þá í bloggfærslu (sem ég hyggst ekki gera aftur). Ætli ég sé kominn á svarta listann?

110692636208866222

Hvernig í ósköpunum er hægt að deila við mann sem spáir 0-0 úrslitum í handboltaleik Íslands og Rússlands vegna ófyrirséðra veðurskilyrða?

Í dag hét ég þess að hætta að rífast um sálfræði við fólk. Ykkur er því óhætt að lofsyngja gildi sálgreiningar og huglægra túlkana á rannsóknarniðurstöðum í viðurvist minni.

Þessi helgi verður annars hrúguð verkefnum dauðans svo ég verð lítið á ferli. Ég gægist kannski örlítið út um turngluggann minn til að fylgjast með hvað er að gerast.

Ferðalög og kókaínfíklar

Skyndilega er ég orðinn gagntekinn einhvers konar ferðamaníu. Ég hef því ákveðið, hvort sem bróður mínum líkar betur eða verr, að fara með honum til Þýskalands í tvær-þrjár vikur sumarið 2006 og ná jafnvel nokkrum leikjum á HM.

Annars vil ég taka það fram að ég þoli ekki hljómsveitina Red Hot Chili Peppers og mér finnst Anthony Kiedis vera ljótur og leiðinlegur uppskafningur. Svo er hann kókaínfíkill, skömmin.