Month: júlí 2008

Þingmaður lýgur með tenglum

Bjarni Harðar bloggar um viðtal Sverris Stormsker við Guðna Ágústsson. Hann segir:

[…] af því sem hefur verið bloggað um þáttinn af þeim sem heyrðu er lítill vafi á að Sverrir var hér utan við allt velsæmi.

Þeir sem lesa þetta bara hjá Bjarna hljóta að gera ráð fyrir að á þeim bloggum sem Bjarni vísar þarna í séu menn sem hlustuðu á þáttinn og voru að hneykslast á því sem þeir heyrðu. Það er bara ekki rétt. Annars segist hafa heyrt nokkra þætti Stormskers en segir ekkert sem gefur til kynna að hann hafi heyrt þennan þátt. Hinn sem Bjarni vísar í talar ekkert um að hann hafi heyrt útvarpsþáttinn en segir að Guðni hefði mátt búast við að eitthvað svona myndi gerast. Á bloggunum stendur því eitthvað allt annað en það sem Bjarni sagði og gaf í skyn að stæði þar.

Þetta kallast að ljúga með tenglum. Bjarni hefur gert þetta áður og ætli hann geri þetta ekki barasta aftur. Niðurstaðan er sú að maður skyldi ekki trúa því sem Bjarni Harðar segir án þess að skoða málið fyrst sjálfur.

Mengun í tjörninni

Er einhver búinn að skoða hvað myndi gerast ef hugmyndin sem Egill Helgason minntist á fyrir nokkrum árum um að opna lækinn til að koma á gegnumflæði í tjörninni yrði reynd? Ég tek fram að ég veit ekkert um þessi mál en mér fannst þetta alltaf skemmtileg hugmynd.

Cuil = fluga

Eydís vinkona mín, sem ólíkt mér lærði einhverja írsku á Írlandi, segir að cuil þýði fluga en ekki horn eða viska. Þannig að leitarvélin nýja heitir fluga. Það er skondið.

Bankaorðrómur

Voðalega hljómar þessi færsla hjá Orðinu á götunni eins og að einhver sé að reyna að koma af stað orðrómi. Markmiðið gæti þá ekki verið annað en reyna að koma bönkunum á kné. Ef þeir sem eiga stórar upphæðir í bönkum fara að taka þær út þá er að sjálfssögðu hætta á þeir hrynji, raunstaða bankanna þarf ekki einu sinni að vera mjög slæm fyrir.

Kjúl eða ekki

Cuil er ný leitarvél. Mér finnst hún við fyrstu sín ekki spennandi. Hins vegar er á upplýsingasíðunni mynd af steinhring á Írlandi sem ég heimsótti í fyrra. Ég man ekki hvað hann heitir en hann var ekkert langt frá Kenmare (gúgglaði og fann nafnið: Uragh). Það er annars skondið að hér er því haldið fram að cuil þýði ekki viska eins og haldið sé fram í kynningu á leitarvélinni heldur horn.

Jon Voight um Obama

Það er áhugaverð grein eftir leikarann Jon Voight á vef Washington Times. Hann er aðallega tala um Obama sem hann virðist telja argasta sósíalista þó hann teldist í besta falli hægri krati á íslenskan mælikvarða. Árásir hans á friðarhreyfinguna á sjöunda og áttunda áratugnum er líka áhugaverð. Þessi grein er fín lesning ef maður vill kynna sér viðhorf vitleysinga í Bandaríkjunum.

Blandast ekki?

Það er skemmtileg tilviljun að á mp3 spilaranum mínum eru bæði lög með Duran Duran og George Michael. Dogs and cats living together…. mass hysteria…

Fæðuöryggi og olía

Ég sá komment við bloggfærslu Egils Helgasonar þar var haldið fram að ef olíukreppan verði alvarlega þá myndi ekki skipta neinu máli hvort við hefðum almennilegt matvælaframboð innanlands því að

[á]n eldsneytis er enginn landbúnaður.

Hér virðist gert ráð fyrir að olían muni bara hverfa einn, tveir og þrír. Líklega yrði fyrst tekin upp skömmtun á olíu og þá yrði matvælaframleiðsla efst yfir þá sem fengu olíu. Það er líka þannig að það er ekki öll matvælaframleiðsla algjörlega háð olíu. En við þurfum að nýta rafmagnið betur og þá kannski fyrst og fremst í samgöngukerfinu.

Fyrir nokkrum árum þá var athugað með lestarkerfi innan Reykjavíkur og komist að þeirri niðurstöðu að það svaraði ekki kostnaði. Mig grunar að þær tölur hafi breyst núna enda olíuverð búið að hækka mikið. Ég held að það sé ekki bara nauðsynlegt að skoða möguleikann á einhvers konar lestarsamgöngum innan höfuðborgarsvæðisins heldur líka til að flytja fólk og vörur milli landshorna. Þetta er augljóslega gríðarstórt verkefni en að sama skapi gæti þetta með tíð og tíma sparað ótrúlega háar fjárhæðir. Við erum ekki að tala um fjárfestingar fyrir nokkur ár heldur áratugi og árhundruði jafnvel. En stjórnmálamenn hugsa í fjórum árum í senn og það kemur endalaust í bakið á okkur.

Rafmagnið okkar gæti gert okkur nær óháð olíu í samgöngum á landi en við erum bara ekkert að gera til bjarga okkur sjálf.

Viðbót:

Ég man að ég sá um daginn á Vefþjóðviljanum skammir til Árna Þórs fyrir að endurvekja hugmyndir um lestarsamgöngur í Rvk. Vefþjóðviljamenn voru náttúrulega ekkert að pæla í því að hækkandi olíuverð hefði breytt dæminu.

Grátmúrarmiði Obama

Trúir því einhver í alvörunni að Obama hafi ekki verið fullmeðvitaður um það að töluverðar líkur væru á því að einhver myndi kíkja á miðann sem hann lét inn í Grátmúrinn?

Matvælaöryggi

Ég á svolítið erfitt með að skilja bloggfærslu Árna Helgasonar um matvælaöryggi. Honum finnst allavega lítið til þessa hugtaks koma. Sjálfur held ég aftur á móti að það hættulegasta sem við getum gert sé að minnka sjálfsstæði Íslands í matvælaframleiðslu. Ég efast um að við lendum í vandræðum strax en í framtíðinni gæti það gerst. Stríð gæti raskað matvælaframleiðslu heimsins en hugsanlega er olíukreppa alveg jafn hættuleg. Ef olíuverð rís áfram þá gæti orðið mikið dýrara að flytja matvæli til landsins og við þyrftum þá kannski með litlum fyrirvara að auka framleiðsluna mikið. Ég held að við værum illa stödd ef slíkt gerðist í dag en við gætum verið mikið verr stödd.  Það er ekkert svo einfalt að snúa svona þróun við ef þörf krefur.

Morðtilræði á Ísafirði

Ég fór til Ísafjarðar á dögunum og lenti í því að að mér var otað hníf. Oddurinn var farinn að stingast í mig áður en ég náði að losna við fólið sem á mig réðst.

Vantrúarhittingur með presti

Í gær var spurt hvort að það væri ekki tími á Vantrúarhitting, sérstaklega vegna þess að Mexíkódeildin er á landinu. Þrátt fyrir skamman fyrirvara skipulögðum við þetta með dags fyrirvara. Það mættu 17 manns í heildina sem verður að teljast gott. Eins og venjulega hitti maður nýja félaga og gamla. Það fyndna var að þegar við mættum þá kom Hjalti og hvíslaði að mér hvort að það væri nú ekki prestur á veitingastaðnum með okkur. Ég lít í kringum mig og í horninu situr Karl V. Matthíasson. Þetta þótti okkur skondið. Þegar Matti mætti loksins benti ég honum á þetta og ég held að hann hafi ákveðið að tala sem hæst í kjölfarið. Hugsanlega að reyna að láta nokkur lykilorð eins og biskup og Vantrú berast til prestseyrna.

Eftir hittingin keyrðum við heim Sæbrautina en beygðum niður að sjó þegar við sáum hve magnað sólsetur var í gangi. Við sátum saman á grjótinu þar til að rigningin hrakti okkur á braut.

Að missa allt álit á Saving Iceland

Það er mjög mikið af fólki í bloggheimum sem ég veit ekki til þess að hafa nokkurn tímann haft nokkuð jákvætt um Saving Iceland sem er núna að taka vel og vandlega fram að það hafi misst allt álit á þeim.

Kína og forsetinn

Ólafur Ragnar hefði kannski átt að rifja upp að harðasta gagnrýnin sem Vigdís varð fyrir á sínum ferli var vegna heimsóknar til Kína áður en hann ákvað að fara þangað.

Evran

Þegar Netmogginn birtir tvöfalda bloggfærslu gegn Evrunni þá langar mig helst að ganga í Evrópusambandið. Það er þá á þeirri forsendu að það sé hægt að þekkja góða hugmynd á því hverjir eru mótfallnir henni.

Jónína Ben vitnar í Voltaire

Það vakti kátínu mína að lesa upphafsorð greinar Jónínu Ben í Mogganum í dag. Hún byrjar:

VOLTAIRE skrifaði á 16. öld…

Ó, en gaman. Það að finna tilvitnanir í merka menn á netinu og nota þær til stuðnings máli sínu er nú mikið stunduð íþrótt. Ef það er vel gert þá gæti maður litið út fyrir að vera snjallari en maður í raun er. Allavega betur lesinn. Hugsanlega var þetta einhvern tímann þannig að tilvitnanir voru aðallega notaðar af þeim sem höfðu fundið þær í frumheimildum en sú tíð er löngu liðinn.

Ég ætla ekki að segja að tilvitnanir geti ekki verið skemmtilegar, þær eru það oft, en þær eru almennt merki um ófrumleika. En þeir sem nota tilvitnanir í merka menn geta lent í vandræðum ef þeir þykjast vita eitthvað meira um þá. Maður gæti til dæmis kynnt tilvitnun til sögunnar og gert merkilega manninn tveimur öldum eldri en hann í raun er. Það væri nú neyðarlegt og afhjúpandi um almennt þekkingarleysi á fræga kallinum. Greyjið Jónína. Annars þá ætti að svara efni greinarinnar efnislega en það geri ég líklega ekki.

Annars sagði Voltaire líka eitthvað á þá leið að sniðug tilvitnun¹ sannaði ekki neitt.

Eða sniðugt orðtak, ég er ekki viss þýðinguna. Og ég fann þetta með því að leita á netinu en allavega hef ég lesið² Voltaire og veit hvenær hann var uppi.

² Bara eina bók þó.

Í myrkrinu

Það er notalegt að mæta fyrstur í vinnuna og sjá að húsvörðurinn hefur gleymt að kveikja ljósin. Það væri ágætt að leggja sig bara fram á borðið. En ég hef stóra glugga hérna þannig að mig skortir ekki beinlínis ljós þannig að ég vinn bara. Og böggið, það er búið að kveikja.

Skottulæknirinn Karadžić

Það er merkilegt hvað allar nýaldarskottulækningasíður eru líkar. Því miður hefur síðan Psy Help Energy ekki verið þýdd á ensku en mér sýnist þetta allt vera mjög standard. Undirtitillinn Human Quantum Energy er líka mjög týpískur af því að þar er herjað á þekkingarleysi fólks á skammtafræði eins og nýaldarkuklarar gera gjarnan. Þarna er boðið upp á smáskammtalækningar og ýmsar aðrar hefðbundnar skottulækningar.

Varningurinn sem er boðinn þarna til sölu eru líka áhugaverður. Þarna eru prjónar sem eru líklega svipaðir þeim sem kuklarar nota til að „finna“ rafmagnsmengun, vatn og hvaðeina sem þeim dettur í hug. Síðan eru eitthvað undarlegt apparat sem minnir á kynlífshjálpartæki en er væntanlega eitthvað sem tengist byssukúlum eins og hálsfestin efast á síðunni. Það má síðan ekki gleyma krossunum sem eru nauðsynlegir öllu kristilegum kuklurum.

Þetta er væntanlega með því undarlegra sem stríðsglæpamaður á flótta hefur tekið sér fyrir hendur.

Furðuskepnur og efaleysi

Í 24 stundum má lesa um nýja bók.

„Það er alveg klárt að fólk trúði þessum sögum hér áður fyrr því bókin er öll byggð á heimildum,“ segir Sigurður Ægisson, guðfræðingur og þjóðfræðingur. Hann skrifar textann í bókinni Íslenskar kynjaskepnur[.]

Það er gott að geta fullyrt svona vel og vandlega um hverju fólk trúði í alvörunni. Sú hugmynd kemur ekki einu sinni upp í hugann að fólk hafi hugsanlega sagt þjóðsagnasöfnurum sögur af furðuskepnum án þess þó að trúa þeim raunverulega sjálft. Enginn myndi fórna sannleikanum fyrir góða sögu… eða hvað?

Besta við Firefox 3

Að mínu mati er það besta við Firefox 3 að þegar hann er að bjóðast til að muna fyrir mann lykilorð þá getur maður fyrst séð hvort maður hafi slegið það inn rétt og því festast ekki inn eitthvað mismunað rugl.

Netkönnun um fáfræði

Á Vísi er, eða var, könnun frá Reykjavík Síðdegis þar sem spurt var hvort Tryggvi Þór Herbertsson væri rétti maðurinn í stöðu efnahagsráðgjafa forsætisráðherra. Ég hef áður bent á að notkun netkannanna sé fyrst og fremst merki um lélega blaðamennsku enda eru nær alltaf marklausar. Þessi spurning gengur skrefinu lengra enda er ekki nokkur leið til þess að lesendur Vísis hafi nokkuð vit á hæfileikum Tryggva. Það gætu slæðst inn örfá atkvæði frá fólki sem getur tekið upplýsta afstöðu. Meiriparturinn af atkvæðunum kemur samt augljóslega frá fólki sem hefur fáfræðina eina að til að miða við þegar það er að greiða atkvæði.

Landsbankinn sameinar…

Á Mogganum er frétt um að Landsbankinn hafi sameinað tvö útibú sín. Að sjálfssögðu þýðir þetta að eitt þeirra var lagt niður. Reyndar var engum starfsmönnum sagt upp en það breytir engu fyrir viðskiptavinina sem treystu á að hafa útibú í nágrenninu.