Month: júní 2004

Undarleg forgangsröðun hjá prestinum

Fréttablaðið spyr í dag prestinn í Grafarvogi hvers hún myndi óska ef hún ætti eina ósk og hún biður um að margir mætti á einhverja Grafarvogshátíð. Mér þykir þetta undarleg forgangsröðun, hún hefði getað beðið um frið á jörð, mat handa hungruðum, lækningu handa sjúkum en nei, hún vill að fólk mæti í einhverja grillveislu.

Hver skerðir opnunartíma Þjóðarbókhlöðunnar?

Mér þykir fréttin um breyttan lokunartíma Þjóðarbókhlöðu á heimasíðu Stúdentaráðs illa orðuð. Þar stendur:

Nú er svo komið að forsvarsmenn Landsbókasafnsins sjá sig knúna að skerða opnunartímann verulega.

Í fréttinni er ekkert minnst á ástæðuna fyrir því að skerða á opnunartímann. Í raun og veru er það Háskólinn sem ber ábyrgð á þessum breytingum vegna þess að hann er að hætta að borga fyrir þennan aukalega opnunartíma. Hvers vegna er Háskólinn að hætta að borga? Mér skilst að það sé vegna þess að Stúdentaráð hefur verið að þrýsta á að hafa aðrar lesastöður opnar lengur. Hver er sökudólgurinn?

Hvað ef, réttur samanburður, skrýtnar ályktanir og fífldirfska

Hvað ef Ólafur Ragnar hefði skrifað undir fjölmiðlalögin? Ég hefði ekki haft fyrir því að mæta á kjörstað og ég veit um ótal marga sem hefðu líka hunsað kosningarnar. Einhverjir sem skiluðu auðu hefðu kannski kosið hann en áttum okkur á því að það er ótrúlega stór hópur sem hefði aldrei kosið kallinn þannig að það að túlka öll auðu atkvæðin sem viðbrögð við því að Ólafur neitaði að skrifa undir er bara út í hött. Margir hafa hræsnað gríðarlega síðastliðinn mánuð og kallað upp fyrir sig að Ólafur sé ekki lengur sameiningartákn þjóðarinnar þó að þeir hafi í raun aldrei litið á hann sem neitt sameiningartákn.

Eitt það heimskulegasta sem hefur komið fram í umræðunni síðustu daga er að bera kosningaþátttöku saman við síðustu Alþingiskosningar sem voru ákaflega spennandi með mikilli kjörsókn. Hið eina rétt er að bera kosningaþátttöku saman við það þegar Vigdís fékk mótframboð 1988, þátttakan þá var frekar lítil enda var þar líka um að ræða kosningar þar sem allir vissu fyrirfram hvernig færu.

Mér þykir undarlegt að fólk skuli taka útkomuna (93% þátttaka) úr könnun Fréttablaðsins um kosningaþátttöku í þjóðaratkvæðagreiðslunni án nokkurra fyrirvara, það fyrsta sem ég leit á þegar ég sá fréttina var hve stór hópur neitaði að svara og það var um 40%. Ég hefði haldið að þessi 40% sem neitað svara væru einmitt ólíklegri til þess að kjósa heldur en þeir sem svöruðu. Þessi 40% eru væntanlega ekki með miklar skoðanir á málinu á meðan restin er líklega þeir sem hafa sterkar skoðanir.

Ég fatta annars ekki hvað Sjálfstæðisflokknum gengur til með því að ætla að hafa láta þessi 44% takmörk gilda í þjóðaratkvæðagreiðslunni, þeir geta eiginlega ekki annað en tapað á þessu. Þeir fá kjósendur upp á móti sér með þessu,hvetja andstæðinga laganna til þess að mæta en að sama skapi hvetur þetta stuðningsmennina til þess að sitja heima. Í raun væri versta útkoman fyrir Sjálfstæðisflokkinn í þjóðaratkvæðagreiðslunni ekki ef 44% þjóðarinnar myndu greiða atkvæði gegn frumvarpinu heldur ef 43.99% myndu greiða atkvæði gegn því, það myndi hleypa illu blóði í fólk. Þessi 44% mörk eru fífldirfska af hálfu Sjálfstæðisflokksins með áherslu á orðinu fífl.

Hvað er að Geir?

Hvernig í ósköpunum getur Geir H. Haarde haldið því blákalt fram að enginn hafi haldið að málskotsréttur forseta Íslands væri fullgildur þegar ótal manns hafa í gegnum tíðina hvatt forseta Íslands til þess að nota þennan rétt? Hvað er að manninum? Ég bara spyr.

Stilltur gítar og húsgögn

Aðalsteinn frændi renndi hérna við og stillti gítarinn minn, hrósaði honum meiraðsegja töluvert, núna vantar bara að stilla gítarleikarann og þá verður allt gott.

Annars þá erum við búin að fá allt að norðan, búið að afhenda Stekkjargerðið. Hérna eru húsgögn útum allt.

Og ég lét verða af því

Í nótt kom ég heim af tónleikum og fór að spjalla við Bigga, minntist á hve frábær Gunnar hefði verið á bassanum og að mig hefði alltaf langað til að spila á bassa (og í raun líka á trommur), ég talaði líka um að á unglingsárum hefði mig langað að læra á píanó. Ég sagði líka að væntanlega væri einfaldast að kaupa sér ódýran gítar og prufa sig áfram þannig. Biggi hvatti mig áfram, sagði að rétta leiðin væri bara að prufa sig áfram og áðan fór ég og keypti ákaflega ódýran (og væntanlega lélegan) gítar í Hagkaup.

Nú er um að gera að fá Aðalstein frænda í heimsókn (eða fara í heimsókn til hans) til að láta stilla gítarinn (ég held að hann sé ekki stilltur en hvernig á ég að vita svonalagað). Ég er ákaflega ánægður, oft hef ég verið að spá í að gera eitthvað svona en loksins lét ég verða af því og ætla að læra á gítar á gamalsaldri.

og þeir rokkuðu aftur

Týr rokkuðu líka í kvöld, ég var ánægður, myndi helst vilja elta þá um landið en ég læt það vera. Vona að þeir komi fljótt aftur. Ég á væntanlega eftir að láta inn fleiri myndir en hér eru tvær til að byrja með:
Færeyjingarnir fræknu
Þessi mynd er í raun ekki myndin sem átti að taka heldur er verið að setja fólk í stellingar og mér fannst hún bara svo skemmtileg að ég varð að setja hana inn. Þetta eru semsagt Kári, Eivör og Heri. Ég sýndi Eivöru þessar myndirnar sem ég tók af þeim, hún var mishrifinn.

Óli með Tý
Fanboy myndin, raunar voru þeir búnir að stilla sér upp fyrir myndatökur með öðrum þannig að ég ákvað að stökkva á þá líka og fá mynd af mér með þeim öllum. Þeir voru alveg búnir á því, spiluðu í tæpa tvo tíma án þess að taka sér hlé. Ef ég man rétt þá er röðin frá vinstri: Heri, Óli, Ottó, Gunnar (sem var sérstaklega frábær í kvöld) og Kári.

Þrátt fyrir að Ottó sé að létta á honum Heri (og Ottó er góður, það er enginn vafi) þá sér maður Heri samt taka þessi ótrúlegu sóló á meðan hann syngur um leið, það er ekki á færi hvers manns.

Núna er það sturta og svefn.

Kosningar

Við kusum í fyrsta sinn sem Reykvíkingar í dag, þurftum þar af leiðandi að finna staðsetningu Hagaskóla. Þetta gekk vel fyrir utan hve hvasst var. Í kjörklefanum þá íhugaði ég augnablik að stoppa í smá tíma og þykjast hugsa en hætti við það og krossaði bara við Ólaf einsog ég hefði gert hvorteðer.

Það var annars skrýtið að í morgun þegar við vorum að tala um hvað við þyrftum að gera í dag þá mundum við ekki strax eftir því að það væru kosningar, það er enginn kosningafílingur enda engin raunveruleg spenna um úrslitin. Kannski hefði verið gáfulegra af Ólafi að taka aðeins þátt í kosningabaráttunni til að hvetja fólk til að kjósa. Núna er staðan óheppileg að því leyti að fjölmargir hafa ekki nennt á kjörstað án þess þó að hafa ætlast til þess að sú athöfn yrði túlkuð sem andstaða við Ólaf þó þetta verði væntanlega gert. Það að mæta á kjörstað og skila auðu er raunveruleg afstaða ólíkt því að mæta ekki.

En hvað um það, nú munu andstæðingar Ólafs túlka úrslitin sem ósigur fyrir hann á meðan stuðningsmenn hans munu segja að hann hafi sigrað. Ólafur getur allavega verið ánægður með eitt, hann var ekki kosinn sem puntdúkka.

Var ég ekki örugglega fyrstur að benda á að allar forsetaframbjóðendafrúrnar væru af erlendu bergi brotnar? Ég held það.

Ég sá afa í sjónvarpinu áðan, hann var að kjósa á Akureyri, ég efast ekki að hann hafi kosið rétt. Gaman að sjá kallinn.

Týr rokkar

Brilljant alveg. Við fórum út á Akranes og drógum síðan Bigga með okkur á tónleika með Tý og það var frábært. Þeir virðast hafa miklu meiri orku eftir að þeir fengu Ottó í lið með sér. Biggi virtist meiraðsegja falla fyrir þeim og það er nú mikið sagt. Grand Rokk í kvöld, Týr, be there or be rectangular.

Andríki styður Baldur

Andríkismenn reyna að vera fyndnir í dag en það er ekki sérstaklega vel heppnað hjá þeim, ég skal lána þeim átta hliða tening ef þeir vilja.

Annars er nú bara bjánaleg þessi staðhæfing þeirra að Baldur sé eini frambjóðandinn sem vilji upplýsa þjóðina um stefnumál sín, hefur það farið fram hjá einhverjum hver stefnumál Ástþórs eru? Friðarstefna með brjálæðislegum yfirtónum. Ólafur Ragnar hefur hins vegar bara sýnt það í verki hvernig forseti hann er og hvernig hann vill vera. Hvaða stefnumál hefur Baldur? Að vera puntdúkka á Bessastöðum? Ef við vildum puntdúkku þá gætum við fundið einhvern fríðari en hann í hlutverkið.

Einu sinni poppað, þú getur ekki hætt?

Það er eitt sem ég hef oft pælt í og hef nú ákveðið að deila með ykkur(hugsanlega hef ég einhvern tíman gert það áður enda hef ég staðið í þessu rugli í nærri tvö og hálft ár).

Þið munið eftir Pringles auglýsingunum sem hljómuðu eitthvað á þessa leið:“einu sinni poppað, þú getur hætt“ – Þetta átti augljóslega að skiljast á þann veg að ef maður byrjaði (poppaði upp lokinu) á bauk af Pringles þá gæti maður ekki hætt að éta flögurnar. Mér hefur alltaf þótt þetta ákaflega mislukkuð auglýsing þar sem að aðalkosturinn við Pringles er að það er einmitt svo auðvelt að hætta að borða flögurnar með því að láta lokið aftur á baukinn.

Svona er ég nú djúptþenkjandi.

Erfitt að fá ókeypis sendingu

Ég veit ekki hvort ég hef minnst á þetta áður en það voru mistök með pöntun sem ég fékk frá Amazon um daginn. Indiana Jones pakkinn innihélt tvö eintök af Indiana Jones and the last Crusade en ekkert af Temple of Doom, ég þurfti þar af leiðandi að senda þetta til baka.

Fyrir viku fékk ég tilkynningu um að ég hefði fengið sendingu sem biði eftir mér á Tollmiðstöð póstsins upp á Stórhöfða þó vanalega sé svona sent heim. Mig grunaði hvað vandamálið væri og fékk það staðfest núna áðan þegar ég fór að ná í þetta, mér var nefnilega sagt að það vantaði reikninginn. Ég benti að sjálfssögðu um leið á þá staðreynd að reikningurinn væri þarna og það væri bara stórt núll á honum.

Starfsmenn póstsins vildu bara ekki trúa því að þetta kostaði ekki neitt þó það hefði verið einfalt mál fyrir þá að lesa bréfið sem fylgdi til að átta sig á stöðunni en nei það þurfti að draga mig alla leið uppeftir. Héldu þeir að ég væri í einhverju samsæri við Amazon um að sleppa við toll á nokkrum dvd-diskum.

Þetta reddaðist þó þegar ég mætti og sagði frá þessu, nú get ég horft á þessar aukamínútur af Temple of Doom sem hafa verið klipptar úr flestum ef ekki öllum evrópskum útgáfum af myndinni.

Símastúss áfram

Nýi síminn kominn í gang og ég er þegar byrjaður að nýta alla þessa nýju og flottu möguleika sem flestir fengu fyrir svona fjórum árum. Eygló fær sérhringingu, það er Crazy Little Thing Called Love. Almenna hringingin er Keep Yourself Alive (af Queen með Queen ef þið vissuð það ekki). Ég er búinn að láta inn nokkrar aðrar hringingar, allar Queenlög. Ég fann semsagt síðu með uppskriftum að Queenlögum fyrir Nokiasíma.

Ég hef ekki ennþá getað sent sms úr símanum, það er eitthvað að sem ég skil ekki, vonandi er auðvelt að leysa það mál.

Gamli síminn vísar nú á talhólf þar sem ég þvaðra samhengislaust og minnist í leiðinni á nýja símanúmerið, allir glaðir með það. Ef þig vantar símanúmerið mitt þá er hægt að biðja mig um það hérna í kommentakerfinu og ég sendi það umsvifalaust til þín, vonandi..

Hinir frambjóðendurnir

Þetta finnst mér afgreiða þennan forsetaframbjóðanda:

Baldur Ágústsson segir að auka þurfi virðingu forsetaembættisins. Af einhverjum ástæðum virðist hann telja það best gert með því að kjósa hann forseta. Þar erum við ekki sammála.“
– Pulla

Á svipaðan hátt mætti segja að ég og Ástþór séum sammála um að það væri gott að hafa friðarsinna á Bessastöðum en við erum ósammála um hvaða friðarsinni ætti að fara þarna inn. Ástþór virðist halda að ef fólk sé á móti stríði þá sé augljóst að það styðji hann. Ég er alls ekki ósammála Ástþóri í öllu en hann er bara aðeins of klikk.

Nýtt símanúmer á morgun

Ég keypti gsm síma í morgun, Nokia 5210, hann er einn af þeim stærri sem til eru núna en samt dvergur miðað við minn gamla. Nýji síminn og nýja númerið fara í notkun (sem er borið fram notkun en ekki nottkkun einsig starfsmenn RÚV halda) á morgun.

Það hefur verið töluvert að gera í vinnunni í dag, það er ágætis tilbreyting.

Nýjan síma

Ég verð að fara að kaupa mér nýjan síma, ætlaði að gera það áðan en sérlegur símakaupahjálparmaður minn var ekki við, ég fer þá bara á morgun. Síminn minn er Nokia 5110 og er orðinn fimm ára og tveggja mánaða. Hann hefur þurft að þola margt, í fyrra þá varð hann dáltið leiðinlegur en lagaðist fljótt aftur. Núna held ég hins vegar að tími hans sé kominn, hann er byrjaður að slökkva á sér og sprungan í kringum loftnetið er orðin afskaplega stór. Mig langar í raun ekkert að skipta um síma, þessi hefur virkað ákaflega vel, mig grunar að ég fái aldrei jafn góðan aftur.

Ég er að spá í að skipta um símfyrirtæki í leiðinni, fara yfir í Voðafón þannig að ég verð ekki í neinum viðskiptum við Símann lengur, þar með líkur 8 ára leiðindum. Engin sms verða send með tilkynningu um númeraskipti, þess í stað mun ég setja talhólfsskilaboð á gamla númerið mitt með nýja númerinu mínu, fólk verður bara að sætta sig við það.

Góð og vond ævisaga

Um helgina byrjaði ég að lesa bók um George Harrison sem heitir The Quiet One. Ég gafst upp rétt um það leyti sem Bítlarnir voru að taka upp endanlegt nafn sitt. Ég er ekki gjarn á að hætta að lesa bækur eftir að hafa byrjað á þeim en það var bara ekki hægt að halda áfram með þessa. Höfundurinn var alveg að drepa mig með leiðinlegum stíl, heimskulegum athugasemdum og óhóflegri notkun sinni á samheitaorðabókum. Hann virtist líka á vissan hátt vera að sleikja Harrison upp sem er aldrei góð leið til að skrifa ævisögu.

Eftir að hafa fleygt hinum þögla frá mér þá byrjaði ég á bók um Woody Allen, sú var allt öðruvísi. Höfundurinn talar hreint og beint um Woody án þess þó að vera að setjast í eitthvað dómarasæti. Ég er raunar ekki kominn langt með bókina (Woody er alveg að fara að skrifa What’s new Pussycat) en hún lofar góðu.

Ljós og myrkur

Um helgina voru loksins sett upp gluggatjöld í svefnherberginu okkar, einmitt þau sem mamma Eyglóar saumaði fyrir okkur þegar við bjuggum í Stekkjargerðinu. Áður vorum við bara með rimlagardínur, hvítar rimlagardínur. Það að hafa ekkert nema hvítar rimlagardínur fyrir svefnherbergisglugga á Íslandi að sumarlagi er vonlaust, þetta heldur varla neinni birtu úti sem veldur að sjálfssögðu einhverjum truflunum á svefni.

Það er allt annað líf að hafa þessi dökkgrænu gluggatjöld, það er ákaflega auðvelt að sofna og ég vakna ekki vegna ofbirtu á nóttunni. Þegar ég kem fram á morgnanna þá er fyrsta hugsunin sú að það sé alveg dregið frá í stofunni en í raun og veru er einfaldlega svona bjart af því að þar inni eru hvítar rimlagardínur. Þegar við vorum að kaupa eitthvað til að láta fyrir stofuglugggana þá ætluðum við að finna litaðar rimlagardínur en fundum hvergi. Hvers vegna?
Talandi um heimilið þá þurftum við að rýma til í geymslunni í gær til að koma þvottavél fyrir, við fáum þvottavél væntanlega í kvöld ásamt stólnum hans afa, símastólnum (sem fer niður í geymslu) og náttborðunum úr Stekkjargerði. Lífið er skrýtið.

Lélegur í körfu

Ég fór í körfubolta í gær og það var besta mæting frá upphafi (sumars), Starri rændi nefnilega hóp af Borgnesingum (fyrrverandi vinnufélagar, skólafélagar og nágrannar) sem höfðu ætlað að fá Aðalstein frænda í körfu, Aðalsteinn sjálfur var ekkert að mæta enda aumur eftir síðasta skipti. Siggi mætti líka og var maður kvöldsins þó hann sé sjálfur að væla eitthvað um að hann hafi ekki staðið sig vel.

Ég stóð mig hins vegar alls ekki vel, var alveg út að aka og ekkert sáttur við sjálfan mig nema kannski í einum leik. Litla fólki fór illa með mig, hvernig á maður að geta þessa puttalinga þegar þeir koma til að ræna af manni boltanum? Gengur bara betur næst, vonandi, allavega gekk betur síðast þar sem ég skoraði ótal körfur.

Einn ástæða fyrir lítilli velgengni minni er væntanlega að skórnir mínir eru endanlega ónýtir, þegar húðin rifnar upp af tánum vegna þess að götin eru svo stór þá bendir það til þess að það ætti að endurnýja skóna.

Ég kláraði loksins að pumpa í boltann minn í gær sem þýðir að ég mun væntanlega geta æft mig aðeins fyrir næstu skipti.

Má ekki spila eitt gott lag?

Ég var í gær í Kringlunni með Eygló, þar var fullt af fólki og leiðinlegt loft (tek fram að almennt er ég ekki of neikvæður fyrir Kringlunni). Eftir nokkrar búðir var ég að fá nóg og fór því aðeins út til að fá mér ferskt loft, ég minnist á þetta af því þar sem ég var þarna sem aumastur að anda að mér lofti heilsaði Særún mér.

Hvað um það.

Næsta búð var Deres og viti menn, það var verið að spila Kashmir með Led Zeppelin þegar ég gekk inn um dyrnar, þvílík gleði sem spratt fram í mínu litla hjarta, ég sá fyrir mér að lifa af þessa búð bara út af laginu en… Einhver lúðinn í búðinni hefur tekið eftir að það hafði komist almennilegt lag í spilun og hljóp til og skipti um lag, spilaði eitthvað persónuleikalaust og ógeðslegt, ég flúði búðina. Það mátti greinilega ekki einu sinni spila eitt gott lag.