Frúin bloggar

Ég hef ekki bloggað síðan í fyrra sé ég, vá hvert fór þessi tími eiginlega?

Það er nú örugglega engin sem les þetta lengur en ég ætla samt að gera smá upptalningu frá atburðum síðasta árs (úr okkar lífi ekki landsmálefnum, það tæki allt of langan tíma og allir aðrir bloggarar hafa gert því góð skil.)

*Nýtt ár hófst í Grafarholti hjá Sillu systur og fjölskyldu. Pabbi, Höskuldur, Ásta og synir hennar voru þar einnig með okkur.
* Í byrjun árs var íbúðin okkar klár, allir veggir komnir upp og því hægt að flytja inn úr gámnum. Það var svo mikill munur að búa ekki í pappakassa en við höfðum þá búið þannig síðan í maí 2007.
*1.mars fórum við í brúðkaup hjá Úllu og Pétri í Garðabæ og var dagurinn þeirra alveg yndislegur.
*Í mars vorum við í fyrsta skipti heima hjá okkur á páskunum sem var mjög fínt, en ég reyndar var að vinna nánast alla páskana. Tengdó og bræður Hrafnkels voru hjá okkur í Kópavoginum.
*Í lok mars hætti ég að vinna í Fríhöfninni og var það mikill léttir að þurfa ekki að keyra Reykjanesbrautina lengur.
*Í byrjun apríl hóf ég störf á Grand hótel.
* í apríl fór ég í sumarbústaðarferð með saumógellunum. Við löggðum af stað í sól og blíðu en heim í þvílíka snjónum.
* Í maí fór Hrafnkell í fyrsta skipti í sumarfrí á ævinni og naut þess í botn, verst samt að ég var að vinna á þessum tíma.
* 23.maí fórum við svo til Orlando með tengdafjölskyldunni minni og áttum alveg frábæran tíma þar:-)
*4.júní hélt ég upp á 26.ára afmælið mitt í Orlando og fékk voða fína ameríska afmælistertu;-)
* Við komum svo heim til Íslands 6.júní
*Hrafnkell fór austur á Skriðuklaustur 8.júní og byrjaði að vinna 9.júní.
* 12.júlí fórum við í brúðkaup til Rósu og Jónbjörns í Eyjafjarðarsveit og var dagurinn alveg meiriháttar.
*Kvöldi 12.júlí var svo farið á tónleikana Úlfaldi úr mýflugu í Mývatnssveit þar sem Hrafnkell var að spila með Thingtaki.
* 14.júlí áttum við 1.árs brúðkaupsafmæli og héldum upp á það fyrir austan þar sem Hrafnkell var að vinna. Fórum á hótel og höfðum það kósý, Hrafnkell gaf mér ljóð um okkur og pappírsbrúðkaupið, honum fannst það viðeigandi að skrifa ljóðið á pappír.
*19.júlí var haldið í brúðkaup á Húsavík og nú til Hjalta og Láru Sóleyjar. Frábær dagur í alla staði.
*1.ágúst (verslunarmannahelgi)fór Hrafnkell norður til að byggja sumarhúsið okkar, meðan ég var að vinna alla helgina.
*2.ágúst átti Hrafnkell 27.ára afmæli og hélt upp á það fyrir norðan með fjölskyldum okkar en ég gat því miður ekki verið með honum þar sem ég var að vinna í Reykjavík:-(
*7.ágúst fór ég keyrandi norður á Fiskidaginn á Dalvík.
*8.ágúst fór Hrafnkell fljúgandi frá Egilsstöðum til Reykjavíkur þar sem hann var á leið á tónleika með Eric Clapton. Ég aftur á móti fór á friðarkeðjuna og fiskisúpukvöldið á Dalvík og áttum við bæði yndislegan dag þrátt fyrir að geta ekki verið á öllum stöðum en við vorum líka boðin í brúðkaup á Neskaupsstað hjá Jóni Hafliða og Huldu og fannst okkur leiðilegt að geta ekki verið þar.
*9.ágúst fiskidagurinn mikli. Frábær dagur og flugeldasýningin sú flottasta sem sést hefur og verður lengi í minnum höfð.
*10.ágúst kom Hrafnkell norður og við fórum svo saman á Skriðuklaustur og ég var hjá honum í 2 daga áður en ég þurfti að fara heim í vinnu.
*22.ágúst síðasti vinnudagur Hrafnkels á Skriðuklaustri og hann kom heim seint þetta kvöld. Loksins búin að fá hann heim:-)
*25.ágúst byrjaði Hrafnkell að vinna við uppgröft á Alþingisreitnum.
*6.september fórum við í sumarbústaðarferð með fornleifasaumaklúbbnum okkar og var alveg frábært, allir 11 meðlimir gátu mætt sem var frábært.
*6.nóvember fór ég til Frankfurt með systrum mínum, systurdætrum, bróðurdóttir, móðursystrum, mágkonu og ein vinkona fékk líka að koma með. 10 hressar og skemmtilegar stúlkur í skemmtiferð. Þrátt fyrir að krónan væri óhagstæð tókst okkur að gera góð kaup og ekki eyða of miklu:-)
*9.nóvember kom ég heim til eiginmannsins sem beið spenntur eftir að fá þýskt súkkulaði og senseo kaffitegundir sem ekki fást á Íslandi;-)
*18.nóvember var svo frænkukleinubakstur og voru 1400 kleinur steiktar á einu kvöldi og var þetta rosa gaman. Á ennþá kleinur í frysti ef einhver vill kíkja í heimsókn;-)
*21.nóvember. Var árlegur sörubakstur okkar Sillu systur og voru ca 200 sörur bakaðar þennan dag. Ég á líka ennþá sörur í frysti ef einhver vill koma í heimsókn;-)
*29.nóvember var svo árlega fjölskylduaðventustund. Þá hittumst við systkinin með mökum og börnum og aðventukransarnir eru gerðir.
*7.des laufabrauðsgerð fjölskyldunnar
*19.des fór Hrafnkell í jólafrí og ég í sjúkraleyfi
*21.des lögð inn á sjúkrahús.
*24.des fór ég í aðgerð og fékk svo að fara heim um 3 leytið. Ég vil þakka öllum fyrir hlýjar kveðjur meðan ég var á sjúkrahúsinu. Ég á yndislegustu fjölskyldu og vini sem nokkur maður getur óskað sér:-) Ég var hálf klökk yfir öllu góðu kveðjunum sem þið senduð mér.
Við Hrafnkell eyddum kvöldinu hjá Kristni bróðir og fjölskyldu. Pabbi var líka með okkur og var þetta aðfangadagskvöld mjög hátíðlegt og maturinn mjög góður. Takk fyrir allar jólagjafirnar og öll jólakortin:-) Seinna um kvöldið röltum við niður til okkar og prófuðum nýju Nintendo Wii leikjatölvuna okkar sem er alveg frábær. Allir velkomnir að koma og prófa, eigum orðið nokkra leiki;-)
*25.des við systkinin og pabbi hittumst heima hjá Kristni bróðir og borðuðum saman hangikjöt. Síðan var spilað á spil fram eftir kvöldi.
26.des jólakaffi hjá Sillu systir. Reyndar var líka farið í jólagöngutúr en við hjónin ákváðum að sleppa því þar sem ég mátti lítið gera eftir aðgerðina og því var farið beint í kaffið;-)
29.des keyrðum við norður til Akureyrar
30.des Kíktum við aðeins á Ingunni afmælisbarn og fórum svo á kaffihús með Bobbý og Huldu
31.des komu 5 vinir Hrafnkels frá Bretlandi sem vinna með honum til Akureyrar og fórum við því og tókum á móti þeim og fundum stað á Akureyri fyrir þau til að elda áramótasteikina. Við aftur á móti borðuðum góðan mat hjá tengdó og skutum upp flugeldum hjá þeim. Síðan var haldið í bæinn með bretunum og þar hittum við fullt af fólki, bæði fólki sem við hittum oft og einnig fólk sem við höfum ekki séð lengi.

Þannig var árið 2008 og 2009 er nú hafið og ég trúi því að þetta verði gott ár:-)
(þetta eru þeir atburðir sem ég man eftir, vona að ég gleymi engu)

Við byrjuðum árið á því að heimsækja ættingja og vini sem búa fyrir norðan sem er auðvitað alveg frábært. Sérstaklega var gaman að kíkja á Önnu Sóleyju hafði ekki séð hana í MJÖG langan tíma.
Einnig var gaman að hitta Ingu, Jónu og Ólöfu. Höfum ekki hisst allt of lengi allar saman.
Við Hrafnkell fórum með bretunum til Dalvíkur þar sem keppt var í Wii leikjum allar nætur og þá sérstaklega í keilu.
Fórum svo suður 3.jan og mættum bæði í vinnu aftur 5.jan og fínt að komast aftur í rútínu. Frábært að hitta saumaklúbbsgellurnar mínar sem og þjóðfræðilúðana mína. Svo er hittingur hjá fornleifasaumaklúbbnum í næstu viku og verður það án efa mjög gaman.

Vá langt síðan ég bloggaði, júlí er búinn, ágúst og september fóru jafn fljótt og þeir komu og október bara runninn upp.

Það er orðið haustlegt hér í borginni, vindurinn farinn að láta vita af sér og veturkonungur búinn að setja sig í stellingar. Fyrsti snjórinn féll um daginn og krónan fellur nánast daglega. Vöruverð og bensínverð er þó ekki að falla:-O Ég verð þó að viðurkenna að ég er ekki komin með magasár ennþá vegna þessa og íslenska viðhorfið: “Það reddast” er mér ofarlega í huga. Ég get nú samt sagt það að ég hef enga trú á þessum mönnum sem stjórna landinu okkar frekar en fyrri daginn, svo hvort þetta reddast verður að koma í ljós. Eina sem ég get þó gert er að vera jákvæð og tekið til í mínum fjármálum. Við hjónin þökkum fyrir það á þessari stundu að vera ekki með íbúðarlán eða bílalán og ég tala þó ekki um myntkörfulán.

Veturinn er minn uppáhaldstími, ég elska að liggja upp í sófa með teppi, hafa aðeins kertaljós, jólamynd í tækinu og heitt og gott kakó í könnu. Það er sko uppskrift af fullkomnu kvöldi!
Það styttist í jólin Aðeins 80 dagar! JIBBÍ!
Ég er frekar sein í jólagjafakaupum í ár miðað við síðustu ár, bara búin að kaupa eina gjöf. ég verð því að fara að herða mig í jólagjafakaupum. Er einhver með í gjafaleiðangur?

Það er nú ekki mikið að frétta af okkur. Ég er að vinna á hótelinu, Hrafnkell er búinn að vinna við fornleifauppgröft á Alþingisreitnum síðan í ágúst og er einnig farinn í nám í opinberri stjórnsýslu í Háskólanum. Við búum ennþá í Kópavogi og erum sátt og ánægð með lífið og hvort annað:-)

Ég er að fara til Frankfurt í 4 daga í kvennaferð/frænkuferð í byrjun nóvember. Við vorum sem betur fer búnar að borga flug og hótel fyrir löngu en hvort við getum keypt eitthvað er ekki víst. Leggjumst öll á bæn og náum krónunni upp fyrir nóvember;-)

Ég er stödd í vinnunni núna, sjöunda næturvaktin mín af sjö. Kl 08 í fyrramálið er ég svo komin í vikufrí og er margt á döfinni þá, t.d ætlar Jóna mín og fjölskylda að koma að norðan og ætlum við Jóna og Hugrún Jana að fara í smá búðarráp og njóta alls sem borgin hefur upp á að bjóða. Ég hlakka mikið til að hitta þær mæðgur og sjá hvort bumban þeirra hefur stækkað síðan síðast;-)

Rósa mín og Jónbjörn eignuðust stelpu 22. september og óska ég þeim einu sinni enn til hamingju með hana, hún er algjört æði. Við Hrafnkell kíktum á þau fyrir viku og fengum að máta;-)

Við hjónin fórum eina helgi í september í sumarbústað með fornleifaklúbbnum okkar. Við vorum 11 samtals og var alveg rosalegt stuð. Við þökkum enn og aftur fyrir okkur og vonum að farin verði önnur svona ferð innan fárra ára;-)

Annars er voða lítið að frétta nema að það er von á fjölgun í fjölskyldunni. Nei ég er ekki ólétt, heldur Silla duglega systir mín sem ætlar að bæta við fjórða barninu sínu á fimm árum. Hún er skrifuð inn í mars og ég hlakka mikið til að fá eitt systkinabarn í viðbót. Þetta verður systkinabarn mitt númer 15.

Einn gamall brandari í lokin, sem kom upp í hugann:

Maður nokkur lenti illa í bílslysi og eina í stöðunni var að skipta um heila. Konan hans fékk tvo kosti, annars vegar úr arkitekt fyrir 100 þúsund eða hinsvegar úr stjórnmálamanni fyrir milljón.

Konan skildi ekki þennan verðmun, hún spurði því lækninn hvort heili stjórnmálamannsins væri svona miklu betri.

“Nei, Nei” svaraði læknirinn, “Hann er bara svo lítið notaður”.

Kveð að sinni og lofa að blogga tja allavegana fyrir jól;-)

Ég henti inn nokkrum myndum úr sumarfríinu mínu.
Myndum úr brúðkaupi Rósu og Jónbjörns í Eyjafjarðarsveit.
Myndum frá tónleikunum Úlfaldi úr mýflugu sem voru í Mývatnssveit.
Myndum frá pappírsbrúðkaupi okkar hjóna í Hallormsstaðaskógi.
Myndum frá Fljótsdalnum síðan ég var hjá Hrafnkeli í viku.
Myndum frá brúðkaupi Hjalta og Láru á Húsavík.

Ég sem sagt fór víða á þessum 9 dögum. Heimsóttum líka pabba á Dalvík og tengdó á Akureyri.

Átti alveg rosalega góðan tíma með eiginmanninum sem ég sakna mikið núna:(

Ég hennti inn nokkrum myndum á facebook. Fyrir þá sem eru ekki með facebook þá setti ég link hérna til vinstri á síðunni undir myndirnar mínar.
Það eru 6 albúm frá Flórída, albúm frá gæsun Rósu og albúm frá fjölskylduferð í Heiðmörk.

Við hjónin erum búin að bregða okkur til Orlando og erum komin aftur heim. Við áttum yndislegan tíma úti og nutum lífsins í botn. Vildum ekki koma heim heldur setjast þarna að. Það var þó mjög ljúft að koma heim því heima er best:) Veðrið var yndislegt, verðlagið frábært og úrvalið af öllu stórkostlegt:) Við fórum í 4 skemmtigarða, fullt af búðum, prófuðum allskonar mat, sáum eldflaug skotið á loft,fórum á ströndina, lágum í sundlauginni sem var í garðinum okkar og nutum lífsins. Við hjónin fórum líka tvisvar í bíó, fyrst fórum við að sjá The Chronicles of Narnia: Prince Caspian, mjög góð mynd og síðan fórum við að sjá sex and the city og hún er líka mjög góð. Það kostaði ekki nema 450 kr á manninn að fara í bíó þarna. Halló á Íslandi þá borgum við F!##$% 1000 kall. Hvað er málið með það???
Svo það sé skjalfest fyrir einhverja sem lesa þetta og halda að ég sé vond að draga eiginmanninn á svona mynd. Þá var það Hrafnkell sem var búinn að bíða eftir sex and the city myndinni og dró mig með sér á hana ekki öfugt.
Svo átti ég afmæli 4 júní og fékk ég ameríska afmælistertu og afmælissöng líka. Meira að segja fékk ég tvisvar afmælissöng þennan dag, einu sinni í gegnum síma alla leið frá Íslandi.
Hrafnkell gaf mér myndavél í afmælisgjöf, sem var keypt á þriðja degi svo ég tók fullt af myndum sem eru komnar í tölvuna en ekki inn á netið. Ég mun vinna í því mjög fljótlega.
Við komum svo heim á föstudeginum 6. júní. Þá var farið heim að sofa enda allir dauðþreyttir eftir langt ferðalag. Tengdó fóru svo til Akureyrar á laugardeginum. Ég vil bara nota tækifærið og þakka tengdafjölskyldunni og æðislega manninum mínum fyrir frábæra ferð;)

Á laugardeginum var svo Rósa sæta gæsuð og var hún send í stúdíó og látin taka upp lag þar. Við fórum með hana í mecca spa og sendum hana í meðgöngunudd á meðan við lágum í lauginni. Síðan skáluðum við fyrir henni í pottinum og borðuðum ávexti og súkkulaði. Síðan var haldið út að borða og eftir það fóru einhverjir í partý heim til mágkonu Rósu. Ég fór heim eftir matinn til að aðstoða minn heittelskaða við að pakka niður því um hádegisbilið á sunnudag fór Hrafnkell austur á Skriðuklaustur og verður þar næstu 11 vikurnar.
Ég er búin að vera á næturvakt alla vikuna og er núna á sjöundu næturvaktinni sem venjulega ætti að vera mín síðasta en ég tók eina auka næturvakt næstu nótt. Ég fæ svo 6 daga frí eftir þetta og síðan tekur morgunvakt við í tvær vikur.
Hrafnkell kom seint á fimmtudagskvöldið og er búinn að vera heima alla helgina, hann keyrði austur í dag. Það var æðislegt að hafa hann heima um helgina en hefði verið skemmtilegra ef ég hefði ekki verið að vinna öll kvöld og allar nætur.

Sumarið lítur annars bara vel út og við erum boðin í 3 brúðkaup í sumar, líklegast komumst við þó bara í tvö. Svo er innan við mánuður í okkar fyrsta brúðkaupsafmæli:)

Ég sit í vinnunni og bíð eftir því að tíminn líði. Er á minni síðustu næturvakt af 7 í röð og allt er hljótt hér eftir viðburðaríka viku. Við hjónin höfum ýmislegt brallað síðustu dagana. Meðal annars:

Hrafnkell byrjaði í sumarfríi og nýtur þess í botn. Fyrstu dagana notaði hann í að ditta að ýmsu sem hafði beðið tíma á heimilinu. Hann festi upp ljós, skipti um ljósaperur(fyrir þá sem ekki vita er þriggja metra lofthæð hjá okkur og því ekki auðvelt að skipta). Hann hengdi upp gardínu í herberginu okkar, tók tölvurnar alveg í gegn og hengdi upp krók í loftið. Hann sat því ekki auðum höndum.

Við hjónin notuðum inneignir sem við áttum og erum búin að eiga lengi, ein meira að segja síðan við giftum okkur:/ já framtaks og tímaleysi verið mikið að undanförnu. Við fórum út að borða á Argentínu (fyrir inneign auðvitað) enduðum í 6 réttum með 4 vínglösum og Hrafnkell endaði kvöldið með kaffi og vindli. Bryndís var að vinna og stjanaði við okkur eins og við værum stjörnur. Úff við borðuðum alveg á okkur gat og héldum að við gætum ekki staðið upp.
Hávamál koma upp í hugann(í þessu umhverfi er annað óhjákvæmilegt)

gráðugur halur
nema geðs viti
étur sér aldur trega
oft fær hlægis
er með horskum kemur
manni heimskum magi

Ég tók nokkrar aukavaktir í þarsíðustu og síðustu viku í vinnunni. Tók meira að segja að mér þjónastarf á öðru hóteli (fyrir misskilning) í 4 tíma eftir mína 12 tíma í vinnunni. Þetta var mín frumraun í þjónastarfi og gekk bara ótrúlega vel. Þetta er löng saga en ef einhver vill heyra þá er ég alltaf til í kakóbolla;)

Ég fór í þjóðfræistelpumatarboð til Rósu og fengum við mjög góðan mat og rosalega gaman að sjá stelpurnar:)

Við hjónin skelltum okkur norður í land um hvítasunnuhelgina. Fórum í fermingarveislu og fullt af heimsóknum. Ég fór svo heim á mánudeginum þar sem ég átti að mæta í vinnu á mánudagskvöldið en Hrafnkell varð eftir. Hann kom svo keyrandi suður á miðvikudeginum og Arnór og Hörður bræður hans komu með. Þeir dunduðu svo ýmislegt saman bræðurnir á meðan ég svaf á daginn og var í vinnu á kvöldin.

Hrafnkell spilaði með hljómsveitinni sinni í Hafnarfirði síðasta fimmtudagskvöld. Mér skilst að það hafi gengið rosalega vel en hefði mátt vera meira fólk í salnum.

Hrafnkell mætti í vinnu í gær þar sem vantaði starfsmann og hann því fenginn þrátt fyrir að vera í sumarfríi. Enda alltaf gott að fá smá aukapening.

Hrafnkell fór svo keyrandi norður í gær til að skila bíl og bræðrum sínum og fékk svo far með frænku sinni suður í dag. Ég hef ekkert séð hann þar sem ég var farin í vinnu áður en hann kom heim.

Ég er hætt hjá einkaþjálfanum en mæti alltaf þrisvar í viku í ræktina kl 6 á morgnana, nema þegar ég er á næturvakt, þá mæti ég 17:30. Við höfum ekkert slakað á og þetta er þvílíkt hressandi að byrja daginn svona:)

Eftir 3 og hálfan tíma er ég búin að vinna og komin í frí þangað til ég kem heim að utan. Aðeins 5 dagar í Flórída.

Gleðilegt sumar til ykkar allra. Sólin farin að láta sjá sig og veðrið farið að leika við okkur. (Allavegana hér á suðurlandi). Ég er komin á sumardekkin og farin að finna til sólgleraugu og sumarföt;)

Af okkur er allt fínt að frétta. Hrafnkell er alveg að detta í sumarfrí, eftir vinnu á morgun er hann kominn í frí alveg þar til hann fer austur að vinna 9. júní.

Föstudaginn 25. apríl fórum við í afmæli til Filla mágs míns en hann varð fertugur. Við hjónin fórum svo úr veislunni um 23 því Hrafnkell var að fara að spila með hljómsveitinni sinni á Dillon.

Laugardagskvöldið 26. apríl buðum við svo Sverri, Stebba, Hildu og dætrum í mat. Það var mjög gaman að fá þau í mat og skemmtum við okkur mjög vel og vonandi verður þetta endurtekið áður en langt um líður.

Sunnudaginn 27. apríl tók ég aukavakt í vinnunni og vikufríið mitt varð því að 6 daga fríi. Seinnipartinn kom svo öll stórfjölskyldan saman hjá Kristni og Elsbu og mikið var rabbað þar um daginn og veginn. Einhverjir fóru svo út að borða en við Hrafnkell ákváðum að sleppa því í þetta sinn. Enda var ég orðin mjög slöpp og komin með hita og alveg lystarlaus:(

Mánudaginn 28. apríl var ég veik heima:( Alveg hundleiðilegt að hanga svona heima, svaf í 16 tíma og afrekaði að horfa á dvd mynd sem ég hef lengi ætlað að horfa á.

Í gær fimmtudaginn 1.maí fórum við með fríðum hópi til Selfoss. Hrönn og Hákon komu með okkur Hrafnkeli í bíl og Úlla og Pési fóru með Kristínu, Trausta og Thelmu Maríu. Við fórum í heimsókn til Eddu Linn, Ómars og Ragnheiðar Petru og fengum að kíkja á nýja húsið þeirra og sætu bumbuna þeirra;) Fyrst var spjallað og gætt sér á kræsingum sem húsmóðirin var búin að galdra fram og strákarnir fengu að prófa bílaleik. Síðan hélt öll hersingin í sund í góða veðrinu og er ég ekki frá því að ég hafi náð mér í tvær freknur í andlitið og smá roða á axlirnar. Að lokinni sundferð grilluðum við öll saman. Alveg frábær dagur og ég vona svo sannalega að þetta verði endurtekið seinna:) Takk fyrir okkur:)

Annars er margt skemmtilegt framundan.
Við erum að velta því fyrir okkur að kíkja norður um hvítasunnuna:)
Svo er farið að styttast í Orlando og einnig afmælið mitt:) Ég er reyndar búin að sjá það að ég get átt mjög langt afmæli í ár. Byrja það á Íslenskum tíma og enda það á Amerískum;) Ég verð s.s ennþá úti á afmælinu, og að hluta til í flugi líka. Lendi svo snemma daginn eftir að Íslenskum tíma.

Við hjónin fengum tvö páskaegg á páskunum og annar málshátturinn var mjög viðeigandi en hann var svo hljóðandi: Ekki er sú ást auðslitin er ungir bundu.
Þetta er viðeigandi þar sem eftir nokkra daga eru liðin 11 ár síðan við kynntumst og þrjú ár síðan hringarnir voru settir upp.

Það er svo sem ekki mikið að frétta frá okkur. Ég sé varla Hrafnkel þessa dagana, þar sem hann er sofandi þegar ég kem heim á morgnanna af næturvakt og þegar hann fer í vinnuna er ég sofandi. Hann kemur svo heim og við borðum kvöldmat saman og síðan er ég rokin af stað í vinnuna. Þá daga sem ég fer svo í ræktina þá nota í kvöldmatartímann í það og þá sé ég hann ekki neitt. Næsta vika verður þó eitthvað skárri þar sem ég verð í fríi í 7 daga:-)

Það er annars voða fátt að frétta. Hrafnkell er búinn að hafa nóg að gera með hljómsveitinni og spila bæði á ellefunni og á organ. Hann er svo búinn að vera síðustu kvöld í stúdíói að taka upp þrjú lög og upptökum á að ljúka í kvöld. Hrafnkell er svo að byrja að æfa bandý. Það er sem sagt ekki nóg fyrir hann að æfa körfu tvisvar í viku,fara í ræktina tvisvar í viku, kenna á gítar og æfa með hljómsveitinni að minnsta kosti tvisvar í viku;-)

Það er farið að styttast í flórída og að sama skapi fækkar dögunum sem ég hef til að komast í bikiníið:/ Það verður sko algjör draumur að fá smá frí með eiginmanninum, sama hvort bikiníið verður með í för eða ekki;-)

Ég er á minni fyrstu næturvakt núna í vinnunni og eins og þið getið ýmindað ykkur, þá er ekkert að gera.
Á miðvikudaginn síðasta fór ég með vinnunni út að borða á DOMO www.domo.is
Mæli alveg hiklaust með þessum stað. í fordrykk fengum við geggjaðan drykk sem ég veit ekki hvað heitir. Í forrétt fengum við sushi, risarækjur og sashimi og með því japanskt hvítvín. Í aðalrétt fengum við nautakjöt og lúðu og með því ástralskt rauðvín. Eftirrétturinn var einnig rosalega góður og ísvínið sem við fengum með því var alveg geggjað.

Á laugardagsmorgun fórum við saumaklúbburinn í sumarbústað í sól og blíðu. Við stoppuðum á leiðinni og fengum okkur ís og borðuðum hann úti. Fljótlega eftir komuna þangað var kíkt í pottinn. Potturinn bjargaði mér alveg, þar sem ég var að drepast úr strengjum síðan deginum áður. Við stelpurnar elduðum mjög góðan mat og horfðum á söngvakeppni framhaldsskólana. Síðan var aftur skellt sér í pottinn og verið fram á morgun þar;) Þar sem við lágum í makindum í pottinum fór að snjóa. Daginn eftir þegar við ætluðum að fara að leggja í hann(sólahring eftir komuna í bústaðinn) Tókum við eftir að við þurftum að vaða snjóinn að bílunum og grafa bílana út. Það tók okkur klukkutíma að komast af stað vegna þess að annar bíllinn fór ekki í gang og við festum okkur nokkrum sinnum. En með skóflu og startkapla var okkur allir vegir færir;) Við komumst þó heim og ég fór beint heim að ná í Hrafnkel og við fórum í mat til Sillu systir og fjölskyldu. Fengum rosalega gott lambalæri og allt tilheyrandi gumms með. Við fjögur sátum svo og spiluðum langt fram á kvöld.

Halló allir

Það er ekki mikið að frétta af okkur hjónunum í Fjallakór en samt einhverjar smá fréttir.

Ég er hætt að vinna í Fríhöfninni. Ástæða þess að ég hætti er bensínverðið og svo auðvitað leiði við að keyra þessa Reykjanesbraut sem virðist aldrei eiga að klára:-/ Jú svo auðvitað að sú sem var að keyra með mér, hætti í lok febrúar og ég var orðin ein að keyra á milli.
Ég er að vinna í móttökunni á Grand hótel í vaktarvinnu eins og á gamla staðnum.

Ég er byrjuð í einkaþjálfun þrisvar í viku kl 6 á morgnanna. Ekkert mál að vakna kl 6 þegar maður er vanur að vakna fyrir 4 til að mæta í vinnu í Fríhöfninni. Svo reyni ég líka að fara í ræktina þegar tími gefst og einnig í opna tíma. Silla systir er með mér í einkaþjálfun og það er rosa gott að hafa hana með sér:-) Ég er svo að reyna að vera duglega að skreppa í sund á kvöldin með vinkonunum. Svo eru alltaf saumaklúbbar og skemmtilegheit. Við stelpurnar erum einmitt á leið í sumarbústað þarnæstu helgi s.s 11-13 apríl og ég hlakka mikið til:-) Síðan kem ég heim á sunnudeginum 13 og þá höldum við Hrafnkell upp á 10 ára afmælið okkar:)
Föndurklúbbarnir eru líka alltaf á sínum stað, annan hvern sunnudag og núna er stefnan tekin á frænkuferð í vetur til útlanda(ekki búið að ákveða hvert) að versla og erum við byrjaðar að safna:-)

Páskarnir voru fínir. Við vorum hérna heima hjá okkur í Kópavoginum. Ég var að vinna á föstudeginum langa, laugardeginum og sunnudeginum. Á Skírdag fórum við í mat til Kristins bróðir og Elsbu og fengum kjötrétt. Á föstudeginum komu tengdó og bræður Hrafnkels til okkar og voru fram á mánudag. Við borðuðum öll saman rosa gott páskalamb. Við Hrafnkell keyptum okkur páskaegg á síðustu stundu, höfðum ákveðið að kaupa ekkert egg þar sem við værum í áttaki en enduðum á að kaupa eitt handa okkur saman. Síðan gáfu tengdó okkur annað svo við enduðum á að slafra í okkur tveimur eggjum með bestu list:-/ Á mánudagskvöldið fórum við aftur í mat til Kristins og Elsbu en Haukur átti afmæli. Silla, Filli og börn komu svo líka þangað. Við enduðum svo á að spila krossgátuspilið langt fram eftir kvöldi.

Á laugardagskvöldið síðasta fluttum við Hrafnkell heim til Sillu systur og fjölskyldu og vorum að passa Helga Fannar(4. ára) og Pétur Snæ(2. ára) á meðan þau hjónin brugðu sér til London og tóku Dagbjörtu Maríu(7. mánaða) með sér. Það var auðvitað bara gaman að fá að vera með snillingana á meðan og skemmtum við okkur mjög vel, fórum meðal annars í bíó. Foreldrarnir komu svo heim á þriðjudaginn, á afmælisdaginn hennar Sillu. Ég og strákarnir vorum þá búin að undirbúa smá afmælisveislu handa henni. Helgi Fannar vildi hafa prinsessu afmæli fyrir mömmu sína en Pétur Snær vildi mikka mús afmæli. Þetta endaði í prinsessu-mikka mús afmæli. Silla færði mér svo tvennar buxur og tvenna boli og uppáhaldið mitt stórt hvítt toblerone, NAMMI.

Hrafnkell hefur nóg að gera þessa dagana. Hann er í vinnu frá 10 -18 alla virka daga og annan hvern laugardag. Hann fer í ræktina tvo morgna í viku, körfuboltaæfingar tvö kvöld í viku, hljómsveitaræfingar tvö kvöld í viku og oft um helgar líka og svo er hann að kenna á gítar eitt kvöld í viku. Annars fer mestur hans “frítími” í útikörfubolta, laga og textasmíðar eða að vinna í nýja hljómsveitarbílnum. Hljómsveitarbílinn er stór sendiferðabíll sem þeir eru búnir að merkja hátt og lágt með Thingtaks auglýsingum og koma fyrir 3 dvd skjáum, einum spilara og fullt af hátölurum að ógleymdu hreindýraskinni í loftið. Þeir eru sannfærðir um að hvergi á Íslandi finnist flottari hljómsveitarbíll. Annars þá eru tónleikar næsta laugardagskvöld á bar 11 þar sem þeir verða að spila. Allir að drífa sig þangað og líklega verður hægt að sjá hljómsveitarbílinn fyrir utan á meðan.

Nú fer annars að styttast í að Hrafnkell komist í sumarfrí. Hann ætlar að vera í fríi í maí og sinna áhugamálunum betur og slaka á, þar til við förum út í lok maí. Hann fer svo austur að grafa þremur dögum eftir að við komum heim.

ps.. Hrafnkell er að leita að fleiri strákum til að koma og spila körfubolta tvö kvöld í viku með nokkrum hressum strákum. Einu skilyrðin eru að kunna reglurnar og vera EKKI í góðu formi;-) Ef þú veist um einhvern þá endilega hafðu samband.