Það er alltaf gaman af því þegar systurnar Vaka og Röskva senda eitthvað frá sér. Nú síðast gaf Vaka út haustblað sem var eins og venjulega fullt af mjög áhugaverðum punktum. Vaka er dugleg við að eigna sér eitthvað sem þeir eiga ekki, t.d. telja þeir að Erla Guðrún Gísladóttir hafi unnið að gerð stúdentakortanna fyrir hönd Vöku. Fyrir þá sem ekki vita var Erla fulltrúi Háskólalistans í hagsmunanefnd síðasta vetur og samkvæmt heimasíðu Stúdentaráðs er hún það enn. Eitt af því sem Vaka getur ekki stært sig af er að hafa uppfært heimasíðuna. Verst er að þeir gleyma að nefna mig en ég tók þátt í mjög áhugaverðum umræðum á hagsmunanefndarfundi í janúar um litinn á stöfunum framan á kortunum. Ég sakna þess að vera ekki nefndur sérstaklega. Spurning hvort maður ætti að fara fram á að vera nefndur í næsta blaði?
Blaðið er annars lýsandi fyrir þann vanda sem hagsmunabarátta stúdenta er í. í stað þess að vinna saman að því að bæta hagsmuni stúdenta hnakkrífast tvær fylkingar um það hver á heiðurinn af því sem gert er. Allt snýst um að eigna sér eitthvað. Fylkingarnar eru síðan í einhverju óskiljanlegu ástarsambandi við stjórnmálaflokka á landsvísu. Það gagnast þeim sem í fylkingunum eru ágætlega en því miður er hætta á því að ástarsamböndin komi á endanum niður á þeim sem síst skyldi, þ.e. nemendum Háskólans.