Einar Sveinbjörnsson skrifar fína grein í Blaðið í morgun þar sem hann gangrýnir orðagjálfur forystumanna Samfylkingarinnar fyrir síðustu kosningar. Gasprað var um ókeypis námsbækur í framhaldsskólum sem ekki var staðið við þegar flokkurinn fékk tækifæri til þess. Sömuleiðis lofaði flokkurinn því að efnis- og innritunargjöld yrðu felld niður (sú tillaga á líka við um opinbera háskóla).
Alþingi mælist í könnunum með sífellt minna traust landsmanna. Við þurfum kannski ekki að leita langt að skýringum þegar framkoman við yngstu kjósendurna er eins og framkoma Samfylkingarinnar. Atkvæði flokksins út á þessa tillögu hafa örugglega verið ófá. Stjórn SUF samþykkti eftirfarandi ályktun í gær um þetta mál.
Stjórn Sambands ungra Framsóknarmanna (SUF) kallar eftir ókeypis skólabókum fyrir námsmenn í framhaldsskólum eins og Samfylkingin lofaði fyrir síðustu kosningar. Einnig lofaði Samfylkingin því að innritunar og efnisgjöld yrðu felld niður.
Það er ábyrgðarlaust að fara fram með svona loforð sem hefur bein áhrif á fjárútlát ungs fólks ef ekki stendur til að standa við það. Samfylkingin gekk í sumum kjördæmum svo langt að senda út ávísun stílaða á nemendur út af þessu kosningaloforði sínu.
Skorar SUF því á þingmenn Samfylkingarinnar að standa við gefin loforð og tryggja framhaldskólanemum ókeypis námsbækur og að innritunar og efnisgjöld verði felld niður.