Þó liðið hafi ár og öld síðan ég bloggaði síðast þá er ég ekki hættur að setja færslur hér inn. Þróunin hefur hins vegar verið sú að vegna tímaskorts hef ég látið mér nægja að setja inn örstutt skilaboð á Facebook. Tímaskorturinn stafar af undirbúningi kosningabaráttunnar sem er að fara á fullt á næstu dögum. Segja má að undirbúningnum hafi lokið með vel heppnaðri frambjóðendaráðstefnu framsóknarmanna á Háskólatorgi í dag. Það er rosalega góður andi í framsóknarmönnum um allt land og mikill hugur í fólki.
Sigmundur Davíð heillar fólk upp úr skónum hvar sem hann kemur. Hann er að fara í fundaferð á mánudaginn og kemur til með að halda um 20 fundi um allt land fram að páskum. Þeir sem áhuga hafa á að hitta Sigmund ættu að fylgjast með á framsokn.is. SUF er auðvitað á fullu að skipuleggja atburði um allt land. Það eru því spennandi og þétt bókaðar vikur framundan hjá mér. Inn á milli gef ég mér síðan tíma til að sinna MA ritgerðinni minni sem verður sagt frá við betra tækifæri.