Sláturtíðin er að renna sitt skeið á enda og Sjálfstæðisflokkurinn auglýsir nú eftir fólki til starfa. Ekki er verra ef umsækjendurnir hafa starfað í sláturhúsi áður. Uppgefnir og blóðugir upp fyrir haus eftir að hafa nánast gengið frá eigin borgarstjóra reyna borgarfulltrúarnir sex af veikum mætti að sparka niður næsta fórnarlamb. Gamla þreytta Baugsplatan er sett á fóninn (sú sem kom út næst á eftir Jóns Ólafs plötunni). Fjölmiðlarnir eru notaðir enda vel flestir undir hæl Valhallar. Enginn þeirra tekur eftir sex rýtingum í baki fráfarandi borgarstjóra. Enginn spyr hvers vegna hann getur varla gengið. Enginn spyr hvar rýtingarnir eru geymdir sem ætlaðir voru Birni Inga. Fótgönguliðarnir eru virkjaðir ásamt fjölmiðlunum og þeim gefin skýr skilaboð „hafa hátt, ljúga, drepa!“. Drepið Framsókn sem fylgdi sannfæringu sinni. Borgarfulltrúar Sjálfstæðisflokksins halda að smán þeirra felist í því að missa borgina en gera sér ekki grein fyrir því að smán þeirra felst í afbrotinu, því að stinga rýtingunum í bak oddvita síns en ekki refsingunni.