Ég hef ekki tölu á fjölda þeirra samsæriskenninga sem ég hef lesið í kvöld og varða þá ósk þingflokks framsóknarmanna að farið verði betur yfir nokkur atriði í væntanlegum stjórnarsáttmála Samfylkingar og Vinstri grænna. Þar liggja engin óheilindi að baki og þingflokkurinn er ekki að spila einhvern leik. Að baki liggja málefnalega ástæður.
Forsaga þess að framsóknarmenn eru nú í þeirri stöðu sem þeir eru í er sú að þann 21. Janúar sl. lögðu framsóknarmenn á þingi fram tilboð um að verja minnihlutastjórn Samfylkingar og Vinstri grænna vantrausti. Stuðningurinn var háður því að ákveðin skilyrði væru uppfyllt. Eins og öllum er ljóst þá gengu flokkarnir að þessu tilboði framsóknarmanna og hefur verið góður gangur í viðræðunum þeirra á milli síðustu daga. Aðeins er eftir að ganga frá fáum atriðum í sáttmálanum en nauðsynlegt er að vanda mjög til þeirrar vinnu sem eftir er.
Ég hef enn fulla trú á því að ný ríkisstjórn líti dagsins ljós um og eftir helgi. Framsóknarflokkurinn mun allavega leggja sitt að mörkum til þess að það markmið náist.