Month: júní 2003

Ég er farinn

Nei, ég er ekkert farinn en þetta er plan. Í einum þætti af Seinfeld kom George með það plan að yfirgefa alltaf staðinn um leið og hann nær einum góðum brandara af því hann klúðraði öllum bröndurum sem komu í kjölfarið. Þetta er gott plan fyrir mig. Ef ég er í kringum fólk sem skilur ekki húmorinn minn þá á ég til að rugla það alveg með bröndurum og þá er það oft af því að ég hef sagt brandara sem virkaði og vill fylgja honum eftir. Ég verð að hætta þessu, bara yfirgefa svæðið meðan fólkið er ennþá hlæjandi.

Ólavur Riddararós

Í dag kom nýja útgáfan af Ólavi Riddararós með Tý á Rás 2 og ég verð að segja að þetta er líklega flottasta útgáfan af laginu sem ég hef heyrt. Ég hef heyrt þrjá söngvara taka það. Pól Arni Holm tók það á Broadway og Smáralindinni (það rokkaði), Allan Streymoy tók það á samnefndri smáskífu (það var ekki nærri jafn gott) og nú síðast er það Heri Joensen sem syngur.

Ég hlakka til að fá Eric the Red, hann er vonandi á leið til mín í pósti.

Helvítis Síminn

Áðan eyddi ég rúmlega 40 mínútum í símanum í að reyna að ná sambandi við Símann. Þegar klukkan var að verða sex sá ég fram á það að einfaldara væri að fara yfir í Kringluna og redda þessu þar. Fyrrihluta verkefnisins lauk á frekar einfaldan hátt og ég er ekki lengur internetáskrifandi hjá Símnet, seinnihluta verkefnisins lauk ekki jafn einfaldlega. Ég reyndi að útskýra málið fyrir afgreiðslumanninum en hann hefði allt eins getað sagt:“Ég veit ekkert, ég skil ekkert, þó þú útskýrir þetta þannig að greind dýr gætu skilið það þá myndi ég ekkert fatta.“ Mig langaði að standa upp og setjast við næsta þjónustuborð til að reyna að finna vit hjá Símanum en af því ég er afskaplega góður í mér þá gerði ég fokkings hálfvitanum það ekki.

Hvert skref sem maður tekur í átt frá Símanum er unaðslegt.

Geimferð IV: Heim í heiðardalinn

Spock leikstýrir Star Trek IV:The Voyage Home. Þessi er mynd er að mestu leyti gamanmynd og oft mjög fyndin. Risastór hlutur kemur í átt að Jörðinni og gerir flesta tækni óstarfhæfa. Hluturinn er kominn til að spyrja hvalina hvers vegna þeir hafi ekki hringt, hvalirnir hafa ekki hringt af því þeir eru dauðir. Eina leiðin til að bjarga Jörðina er að ferðast aftur í tíman (með oftreyndri aðferð) og ná í hvali.

Áhöfnin velur að fara til Jarðarinnar á seinnihluta 20. aldar (1986 líklega) í stað þess að fara á eitthvað annað tímabil þar sem auðveldara hefði verið að felast og þar sem hvalategundin sem leitað er að er algengari (en þeir vita viti sínu, það hefði verið miklu dýrari mynd, betra að fara bara á götur San Francisco). Gamanið er mest að sjá áhöfnina bregðast við árinu 1986 (oft reyndar bjánalegir brandarar).

Inn í málið blandast hvalavísindamaður og norskir (eða íslenskir) hvalveiðimenn sem eru að veiða við Alaska (jamm, Alaska). Sem minnir mig á að hugsanlega eru fréttamyndir af því þegar er verið að sundurlima hval frá Íslandi. Myndin er frá þeim tíma þegar það var svalt að hugsa um umhverfismál (ólíkt nútímanum þar sem virðist vera svalt að vera sama um þau) en þarna koma þó fram undarlegar hugmyndir um hvali sem hefði alveg mátt sleppa.

Í lok myndarinnar standa allir upp og klappa en það fellur í skuggan af því hve hræðilegur leikari William Shatner er.

Búningarnir eru svipaðir og í síðustu mynd en búningur Spock stendur uppúr.

Takandi í RSS

Ég tók mig til og opnaði dyrnar, dyrnar að rss. Ekki það að ég viti nokkuð um það en ég náði að koma þeim sem eru innan Kaninkunnar og nota MT inn á RSS-yfirlitið hér við hliðina. Ég bætti líka Neil Gaiman þarna inn. Þetta er ekki gallalaust, í fyrsta lagi fara meðlimir Kaninkunnar á toppinn (veit ekki af hverju en það er kannski bara gott og til þess gert að sýna að við erum best) og síðan er Neil Gaiman þarna einhvers staðar niðri með einhverja gamla færslu (það er líklega vandamál hans megin).

Ég var annars að láta mér detta í hug að prufa svoltið, kannski að það virki. Nú er bara spurningin hvort blogger búi ekki sjálfur til RSS eða hvort það sé eitthvað spes sem þarf til að koma til svo ég get bætt öðrum inn.

!!Uppfært!!
Mér sýnist meðlimir Kaninku fara eðlilega niður á við, sjáum hvort það lagist ekki bara að sjálfu sér (ég hef afar lítinn skilning á því hvernig þetta virkar í raun). Ég bætti inn Badabing sem er starfsmaður ákveðins fréttablaðs og getur verið skemmtilegur, hann er líka góður maður því hann er hrifinn af Duran Duran og vísaði einu sinni á mig (hjá honum hét ég „einhver Óli“).

Mér sýnist að ég get ekki bætt við neinum sem nota blogger (nema þeir noti blogger pro en ég veit ekki um neinn sem gerir það), það er leiðinlegt því þar fara Sverrir Páll, Hjördís, Steinunn og fjöldi annara.

Geimferð III: Spock er týndur

Star Trek III:The Search fjallar um leit áhafnar Enterprise að Spock, þau hefðu átt að líta bak við myndavélina því hann leikstýrir myndinni. Myndin er ein af fáum oddatölu Star Trek myndum sem eru góðar, frekar skemmtileg í gegn með frábærum dramtatískum atriðum þar sem William Shatner fær að sýna hve slæmur leikari hann í raun er.

Christopher Lloyd leikur klingona í þessari mynd sem sækist eftir tækninni sem kom fram í síðustu mynd. Kirstie Alley var orðinn of merkileg til að leika í Star Trek þannig að einhver önnur leikur hana.

Búningarnir í þessari eru mjög svipaðir þeim sem voru í The Wrath of Khan enda gerist myndin nær strax á eftir þeirri mynd.

Hárið

Í morgun var ég eldsnemma í vinnunni að taka vakt fyrir félaga minn, afskaplega hress. Ég var að hlusta á Létt FM sem var jafn hresst og ég. Í útvarpinu kom síðan lag úr Hárinu, íslensku útgáfunni frá því fyrir hátt í tíu árum síðan semsagt. Í fyrra fór ég á Hárið hjá LMA (Leikfélag Menntaskólans á Akureyri (sem ég var einu sinni í)), þar lék Hildur vinkona Eyglóar (frænka Evu og Heiðu sem eru sífellt títtnefndari) aðalhlutverkið. Ég var ekkert sérstaklega hrifinn af uppfærslunni í heild sinni en ég verð að segja að Hildur stóð sig afskaplega vel og það var það sem rifjaðist upp fyrir mér. Mig langaði eiginlega meira að heyra Hildi syngja þetta lag heldur en þessa sem söng það í útvarpinu.

Ég tek fram að ég er ekkert sérstaklega mikið fyrir að hrósa fólki að óþörfu og það að minnast á svona hlut ári seinna segir mikið um hve hátt álit ég hef á frammistöðu hennar.

Zombie

Hlustaði á Zombie í gær, nokkuð góður þáttur. Á Móti Sól var í heimsókn þannig að Doktorinn og Grjóni voru sífellt að svívirða þá. Þegar þeir sögðu að öll eintök síðustu plötu hefðu selst þannig að hún væri ekki lengur til þá sagði Dr. Gunni einfaldlega „gott“ og var þá líklega ekki að samgleðjast þeim með velgengnina. Á Móti Sól voru nokkuð góðir í þessu viðtali, tóku svívirðingunum með húmori og skutu líka á Doktorinn („þetta frá manninum sem samdi Prumpulagið“). Síðan var einhver Skítamóralsnáungi og það fór merkilega skemmtilega fram. Mér er minnisstætt hvernig gert var grín að Unplugged plötu Greifanna enda er hún frekar glötuð.

Síðan kom Útvarpsleikrit þar sem Siggi Pönk kom eftirminnilega fram. Zombie topp 11 listinn var líka fyndinn. Listinn fjallaði um væntanleg „sellout“ og innihélt meðal annars:
„Hæ krakkar þetta er Jónsi úr Sigur Rós. Ég drekk bara Pepsi því það er svo kúl“
„Þetta er Siggi Pönk, ég borða bara á American Style“
Gyrðir Elíasson notar bara Sjampó frá Flembís.

og síðan að lokum uppáhaldið mitt:
„Ha, þú hér?“ „Ha, þú hér?“ „Ha, þú hér?“ „Ha, þú hér?“ „Gáfuðu tvíburarnir Sverrir og Ármann nota bara gleraugu frá Gleraugnaverslun Flembís“.

Síðan er spurningin: Hvað er Flembís? Svör skulu koma í kommentakerfinu, sérstök verðlaun verða líklega ekki veitt.

Ég verð samt að efast um að stór hluti hlustenda X-isisins (einsog einn viðmælandi þeirra komst að orði í gær) fatti tilvísanir í Gyrði Elíasson, Sigga Pönk og „Gáfuðu Tvíburana“. Ég hef hins vegar gaman að því þannig að það skiptir mig ekki máli.

Síðan má geta þess að ég hef einsog er ekki fastan tengil á Sverri en hann er inn á Molalistanum hér við hliðina, það á bara eftir að uppfæra nýju staðsetninguna á honum. Ég vona að ég missi ekki hlekkinn þó hann sé ósýnilegur í bili, reyndar er ég líka á þessum lista ósýnilegur. Spurning hvort maður ætti að læra eitthvað um rss til þess að geta bætt við þeim sem vantar pláss. Ég man einmitt að einhver bjó til yfirlit yfir Ármann svo maður gat haft hann inni með smátrixi þó hann væri ekki á Molunum. Langar líka að bæta inn Neil Gaiman.

Þetta minnti mig síðan á að það væri þægilegt ef hægt væri að búa til lítið Kaninku lógó til að hlekkja á forsíðuna, það gæti beint meiri umferð til félaga vorra.

Frjáls og óháður?

Hannes Hólmsteinn er að skrifa ævisögu Halldórs Laxness. Fyrsta bindið á að heita Halldór, annað bindið Kiljan og hið þriðja Laxness. Hannes segist geta komið að þessu efni „frjáls og óháður“.

Frjáls og óháður? Hahahahahahahahahahahahahahahahahahahahahahahahaha.

Trú og matur

Ég var að lesa grein á Straight Dope um mataræði í Íslam og gyðingdómi. Afskaplega heillandi, munurinn á mataræðinu er lítill þó reglurnar séu aðeins mismunandi. Ég hafði líka gaman að því að komast að því að Múslímar sætta sig við að borða Kosher mat (sem hefur verið „afgreiddur“ samkvæmt reglum gyðinga). Síðan sér maður hvað göfugar hugsanir liggja á bak við reglur um slátrun en hins vegar er sorglegt að þessar reglur skuli halda sér þegar þær eru í raun orðnar óþarfar. Þetta sýnir hvað er hættulegt að tengja svona góðar reglur við trú, trúin tekur yfir hefðirnar og niðurlægir góða tilganginn þannig að hið góða hverfur.

Ég er annars afskaplega Kosher í mér, finnst hræðilegt að drekka mjólk með kjöti.

Klám og Útvarp Saga

Ég var að hlusta á Útvarp Sögu í morgun og þar var einhver að tala um að hann hefði verið að ná í tónlist á netinu með forriti sem deilir einnig af harða disk hans. Hann sagðist síðan hafa hætt því þegar hann sá að fólk var að skoða allt sem var á harða disknum hans, í leit að klámi að hans mati. Málið er að maðurinn hefur augljóslega deilt öllum harða disknum sínum í stað þess að deila eingöngu möppunni með tónlistinni. Síðan fer fólk að snuðra (og þá ekki endilega í leit að klámi) þegar það sér að einhver er svo heimskur að deila öllu.

Ég held að sami maður hafi síðan verið að tala um hvað væri mikið af klámsíðum þarna úti með því að telja hvað komu margar síður upp í leitarvél þegar hann skrifaði inn orðið Kinks (og seinna fleiri klámleitarorð (upphaflega var hann víst að leita að „The Kinks“)). Þarna vantar smá skilning á eðli netsins, það eru til miklu meira af síðum sem lofa klámi heldur en síðum sem innihalda klám. Það sem kemur upp í leitarvélum eru yfirleitt síður sem er reknar af fólki sem fær borgað fyrir að vísa fólki á klámsíður sem kostar inn á. Fyrir hverja klámsíðu sem kostar inn á eru hundruð eða þúsund auglýsingasíður. Ekki það að ég haldi því fram að það sé erfitt að finna klám, það er bara aðeins erfiðara en þessi náungi lýsti.

Annars mun ég ekki syrgja dauða Útvarps Sögu í þessari mynd, ég mun heldur ekkert fagna því að fá aðra íslenska stöð (þó sú stöð verði skárri en hin).

Eilífðarvél á leiðinni?

Það sem mér fannst vera frétt vikunnar virðist hafa farið framhjá flestum. Í gær var frétt um það í Fréttablaðinu að Byggðastofnun hefði styrkt einhvern náunga sem er að reyna að búa til Eilífðarvél. Þessi vél á að vera knúin af þyngdaraflinu. Nú væri áhugavert hvort Byggðastofnun hafi látið sér detta í hug að tala kannski við eðlisfræðing áður en styrkurinn var veittur.

Þetta minnir mig á eitt uppáhaldsatriðið mitt úr Simpsons.

Marge: I’m worried about the kids, Homey. Lisa’s becoming very obsessive. This morning I caught her trying to dissect her own raincoat.

Homer: [scoffs] I know. And this perpetual motion machine she made today is a joke! It just keeps going faster and faster.

Marge: And Bart isn’t doing very well either. He needs boundaries and structure. There’s something about flying a kite at night that’s so unwholesome. [looks out window]
Bart: [creepy voice] Hello, Mother dear.

Marge: [closing the curtains] That’s it: we have to get them back to school.

Homer: I’m with you, Marge. Lisa! Get in here. [Lisa walks in, chuckling nervously] In this house, we will obey the laws of thermodynamics!

Geimferð II: Khan Verður Fúll

Star Trek II:The Wrath of Khan er í raun framhald af gömlum Star Trek þætti sem ég hef ekki séð. Í stuttu máli er titilpersónan Khan fúll út í Kirk vegna atburða í gömlum þætti. Byrjað er að finna afsakanir til að draga persónurnar inn í atburðarásina þó margir þeirra séu löngu farnir af Enterprise. Kirstie Alley leikur Vúlkana í þessari mynd. Inn í málið fléttist tilraunatækni sem hefur kraft til að eyða heilli stjörnu og konan sem stendur á bak við þær rannsóknir.

Búningarnir í þessari mynd eru svoltið einsog þeir hafi verið hannaðir fyrir hallærislega 80s hljómsveit.

William Shatner er afar vondur leikari.

Geimferð: Hreyfimyndin

Ég hef ákveðið að horfa á allar Star Trek myndirnar. Fyrst í röðinni er fyrsta myndin, hún heitir Star Trek:The Motion Picture. Hún gerist um 10 árum eftir að fyrstu þáttaröðinni lauk, Kirk er orðinn háttsettur innan StarFleet og Spock er að reyna að hreinsa burt allar tilfinningar sínar.

Fyrsti hluti myndarinnar fer í að koma þeim og öðrum persónum inn í atburðarásina. Þetta gerir þann sem var að taka við stjórn Enterprise ekki glaðan en það er leikarinn Stephen Collins sem ég man eftir úr þáttaröðinni Tales of the Gold Monkey. Efast um að nokkur muni eftir þeirri þáttaröð nema ég, það var svalur Japani þarna sem aðalóvinur í þjónustu einhverrar prinsessu, þetta kemur Star Trek ekkert við.

Stórt ský er á leið til Jarðar og það virðist vera fúlt, Enterprise fer af stað til að stoppa það. Eyðilegg söguþráðinn ekki frekar.

Myndin eyðir óhemjutíma í að sýna okkur þessar frábæru tæknibrellur. Það virkaði kannski 1979 en rúmlega 20 árum seinna er búið að gera þetta allt þúsund sinnum betur þannig að það mætti gera stytta útgáfu af myndinni án þeirra.

Búningarnir í þessari mynd eru þröngir og virðast vera gerðir til að sýna að Shatner er svoltið buff á þessum tíma. Sem minnir mig á að William Shatner er arfaslæmur leikari. Reyndar eru fáir leikarar í þessari mynd sem eru góðir.

Karlmenn eru glataðir

Karlmenn eru heimskir. Ég þoli ekki þá hluta af mér sem falla reglulega inn í karlmennskurugl.

Dæmi um þetta var ég að skoða í vinnunni. Ég var að hjálpa náunga að færa kassa. Hann hafði verið að taka einn kassa í einu, ég gerði þá tilraun með að taka tvo kassa í einu. Það er ekki að spyrja að því, í næstu ferð tók hann tvo kassa í einu. Þetta er nær algild regla, karlmaður getur ekki látið einsog ekkert sé þegar annar karlmaður er að lyfta meiru. Karlmaður þarf helst að lyfta meiru í einu en kona en það segir sig náttúrulega sjálft.

Það er nefnilega fátt heimskulegra en það sem er karlmannlegt við karlmenn.

Undarleg sms skrif

Í vinnunni í gær skrifaði ég sms sem var cirka svona að innihaldi:
Ég elska þig ekki lengur, ég elska aðra konu. Mér þykir það leitt en þú ert skrýtin. Ég mun ekki hringja né senda þér sms nokkurn tíman aftur
Nú gætu einhverjir haldið að samband mitt við Eygló væri í hættu en það er ekki rétt, ég var ekki heldur að segja upp einhverri sem ég var að halda framhjá með. Ég skrifaði þetta sms fyrir vinnufélaga minn. Þetta hefur allt sínar ástæður en það er óþarfi að fara í út í þær, samt er þetta með undarlegri hlutum sem ég hef gert.

Falsaðar fréttir og skammarleg greinarskrif

Maður hefur á tilfinningunni að fréttir af Harry Potter æðinu séu samdar af fólki hjá Pennanum-Eymundsson eða Mál & Menningu í Reykjavík. Í frétt á Netmogganum var sagt að bókin hefði ekki fengist síðan um nóttina þegar hún var sett í sölu. Þetta er augljóslega ósatt. Bóksala Stúdenta átti ennþá til bækur og ég var í Pennanum á Akureyri í gær og sá bókina þar, þónokkur eintök reyndar.

Það er með ólíkindum að svona fréttir komist í gegn en við erum hér að tala um fjölmiðil sem birtir óhugnanlega steiktar greinar eftir Jónínu Ben þar sem hún tengir misnotkun á börnum við trúleysi. Það væri fyrirtaksverkefni fyrir einhvern að útskýra fyrir Jónínu sögu barnamisnotkunnar sem hefur fengið að þrífast innan kirkjunnar, þá sérstaklega þeirrar kaþólsku.

Kann Mogginn ekki að skammast sín?

Hjálpsemi eða afskiptasemi

Meðan ég var á Akureyri þurfti ég að nota IE til að skoða blogg, þar komst ég að því að síðan hans Sverris fer jafn illa í þeim vafra og mín gerði. Af því ég er drengur góður breytti ég síðunni hans án þess að spyrja nokkurn. Ég get reyndar sent hana aftur í sama útlit og áður ef ég verð beðinn.

—
Síðan hefur tekið upp sitt gamla útlit, datt í hug að það myndi gera enda fór ég bakdyrnar að þessu.

Fatakaup

Ég komst að því í gær að ég þarf líklega að fara að kaupa mér nýjan jakka. Sá sem ég hef núna notað síðustu ár, líklega síðust þrjú ár, er ekki lengur sæmilegur. Vasinn er veskið mitt er í er ónýttur þannig að ég þarf að veiða í innviðum jakkans eftir því ef ég þarf að borga eitthvað. Fullt af föstum blettum og síðan eru smárifur byrjaðar að myndast.

Það er fátt sem ég er minna hrifinn af en það að kaupa föt. Ég þarf samt greinilega að fara í innkaupaferðir á næstunni þar sem ég þarf nýjan jakka og allar buxurnar mínar eru að detta niðrum mig eftir að ég byrjaði að grennast.

Lífið er kvöl.

Foo Fighters

Það er ljóst að maður verður að fara á Foo Fighters í ágúst.

Snögg yfirferð leiðir þó í ljós að ég virðist eiga að vera á kvöldvakt þá vikuna. Á morgun mun ég byrja leit mína að einhverjum vinnufélaga sem hefur ekki áhuga á FF og vill skipta á vakt. Kaupi miða hvort sem ég verð búinn að redda þessu eða ekki. Klukkan hvað ætli tónleikarnir byrji? Ef tónleikarnir byrja seint þá er alltaf séns á að komast úr vinnunni á tónleikana, maður er alltaf svo hress eftir vakt í kælinum að það ætti ekki að vera mál.

Vegna fyrri reynslu munu miðar verða keyptir í stúku ef hægt er, það að hafa kærustu sem er innan við 160 cm á hæð með sér í þrönginni er ekki gott.

Snögg ferð til að hitta ömmu

Ég fór norður til að hitta ömmu mína sem er veik. Örugglega ekkert fyrir þá sem eru mér óskyldir eða þá sem hafa ekki hitt ömmu.

Þegar ég kom heim úr vinnunni í gærkvöldi þá sagði Eygló mér að Hafdís hefði hringt. Ég hringdi í Hafdísi og hún sagði mér að amma okkar væri búin að vera á spítala síðan á laugardag og það hefði komið í ljós að hún væri með krabbamein í ristli. Hafdís sagði mér að það ætti að skera hana upp á miðvikudag.

Ég talaði við Eygló og við skoðuðum hvenær væri flogið en þegar Eygló sagði mér að hún vildi helst koma með ákváðum við bara að hoppa upp bíl og keyra norður. Við komum til Akureyrar klukkan hálffjögur um nóttina, á leiðinni sáum við mögnuð sólarlög (fleirtalan er þörf hér) og einnig stórkostlegar sólarupprásir.

Við komum við í 10-11 sem er opin allan sólarhringinn á Akureyri og fær meiraðsegja að vera opin í friði á Hvítasunnudag.

Við vöknuðum snemma til að fá frí frá vinnu, það var ekkert mál. Við höfðum samband við sjúkrahúsið til að vita hvort við gætum fengið að koma utan heimsóknartíma og það var auðsótt. Þegar við komum var amma í baði þannig að við sátum út á svölum í sólinni þar til hún kom aftur.

Það var gott að sjá ömmu því hún var hress og jákvæð einsog hún er alltaf. Við spjölluðum í dáltinn tíma en fórum síðan í þann mund sem hún var að fara í myndatöku.

Næst fórum við niður í bæ, ég fékk mér anísstykki frá Kristjánsbakarí en Eygló fékk sér einhverja óspennandi samloku. Við fórum síðan heim til Hafdísar og ég fór að sofa.

Við fórum aftur á spítalann klukkan hálffjögur og þar voru fyrir Gylfi, Helga og Gummi, síðan komu Hafdís og Sóley og þar á eftir Ella nágranni úr Stekkjargerðinu. Starri og Haukur hringdu síðan báðir í heimsóknartímanum þannig að það amma var svo sannarlega ekki ein.
Eftir stoppið fórum við bara beint af stað suður, stoppuðum í bústaðnum hjá Gunnsteini, Ástu og Ástu Hönnu í mat, vorum komin heim rétt eftir klukkan níu. Undarleg tilhugsun að hafa verið innan við sólahring í burtu.

Á leiðinni suður heyrðum við líka að Anna systir er að koma frá Svíþjóð á föstudag og ætlar að stoppa í viku, hún á reyndar með pantað far í ágúst og þá kemur Haval loksins með henni. Haval hefur ekki komið síðan 1994 ef ég man rétt (sem er ekkert víst).

Á morgun fer amma í aðgerð og ég veit ekkert hvað gerist, hún hress miðað við að hún er níræð og það er erfitt að ímynda sér að nokkuð geti komið fyrir þessa jákvæðu og hressu manneskju. Hún er hjartveik fyrir og svona aðgerðir hljóta alltaf að vera hættulegar fyrir svona gamalt fólk. Ég veit ekkert.

Harpo has spoken

Í gær kláraði ég bókina Harpo Speaks! sem fjallar um Marxbróðurinn sem aldrei talaði í karakter. Bókin er mjög áhugaverð, reyndar ekki jafn mikið um bræður hans og ég hefði kannski viljað en á móti kemur að hún er uppfull af sögum um samskipti Harpo við margar frægustu rithöfunda, leikara og tónlistarmenn þriðja, fjórða og fimmta áratugar síðustu aldar. Sögur af leikjum Harpo og vina hans á áhyggjulausum þriðja áratugnum þegar þú þurftir bara að kaupa hlutabréf til að eignast meiri peninga eru magnaðar.

Fyrrihluti bókarinnar fjallar um þegar Marxbræðurnir (saman og einir) þvældust um Bandaríkin í óvissu um hvort nokkuð væri að hafa úr þessu. Fimmtán ár í þvælingi áður en þeir komust á toppinn. Ef manni finnst skemmtikraftar nú til dags vera að fórna einhverju til að komast áfram þá kemur allt slíkt út sem barnaleikur miðað við ferðalag Harpo og bræðra hans.

Eftir að hafa lesið bæði bækur eftir Harpo og Groucho bróður hans þá er fyndið að sjá hvernig þeir benda á hvorn annan þegar nefna á gáfumennið í fjölskyldunni. Harpo bendir á að Groucho hafi sífellt verið að lesa frá því þeir voru börn, hafi aldrei hætt því. Groucho bendir á að Harpo hafi verið hluti af hinu fræga Algonquin hringborði og hafi umgengist alla helstu menningarvita síns tíma. Harpo sagði að hlutverk sitt við hringborðið hafi verið að hlusta og því hafi hann aldrei tekið mikið þátt í umræðunni. Reyndar finnst mér það ekki endilega vera merki um greindarskort að hlusta frekar en að tala.

En prufið þessa bók ef þið hafið áhuga á Marxbræðrunum, þessum tíma eða þessu fólki.