Hommarnir, lesbíurnar og styrktu trúfélögin

Reykjavíkurborg hefur ákveðið að veita Kristskirkjunni ekki fyrirhugaðan byggingarstyrk vegna skoðana forstöðumanns kirkjunnar á hommum og lesbíum eins og lesa má hér. Mér finnst tvennt athugavert við þessa ákvörðun borgarinnar:

1. Af hverju er Kristskirkjunni refsað sérstaklega fyrir þá skoðun að samkynhneigð sé af hinu slæma og að samkynhneigðir ættu ekki að njóta sömu réttinda og aðrir? Er þetta ekki nokkurn vegin afstaða meira og minna allra trúfélaga á Íslandi? Er t.d. einhver búinn að gleyma áralangri baráttu ríkiskirkjunnar gegn réttindum samkynhneigðra? Lýsa eftirfarandi orð Karls Sigurbjörnssonar biskups um hjónabönd samkynhneigðra skoðunum sem eru annars eðlis en þær sem Friðrik Schram hefur lýst?

Ég held að hjónabandið eigi það inni hjá okkur að við allavegana köstum því ekki á sorphauginn alveg án þess að hugsa okkar gang. #

Það væri líklega hægt að fylla marga pistla með tilvitnunum og gömlum fréttum þar sem fordómar gagnvart hommum og lesbíum hafa komið í ljós í íslenskum trúfélögum. Mér finnst alveg vanta rökstuðning fyrir því að það sem forstöðumaður Kristskirkjunnar boðar sé verra en það sem gengur og gerist í trúarbransanum á Íslandi.

2. Eins röng, heimskuleg, fordómafull og asnaleg mér finnst skoðun Friðriks á samkynhneigðum vera þá á hann rétt á henni. Það er ekki bannað að hafa rangar, heimskulegar fordómafullar og asnalegar skoðanir, sem betur fer.

En hið opinbera veitir trúfélögum styrki. Í mín eyru hljómar það einkennilega að hið opinbera taki upp á því að neita trúfélögum sem hafa idjótískar skoðanir, skoðanir sem eru nota bene að miklu leiti dregnar af trúnni sem félagið er myndað utan um, um styrki úr opinberum sjóðum. Ef trúfélög eiga að fá opinbera styrki þá finnst mér eiginlega ekki hægt að mismuna þeim eftir trúarskoðunum, sama hversu slæmar þær skoðanir eru. Svo lengi sem ekki er um að ræða eitthvað ólöglegt þ.e.

En auðvitað finnst mér fyrst og fremst að hið opinbera eigi bara ekki að styrkja trúfélög yfirhöfuð.

Join the Conversation

6 Comments

  1. Ég tek þessari ákvörðu fagnandi með hoppandi kæti og von í hjarta. Ég tel þetta nefninlega vera fordæmissetjandi; núna þarf bara að sýna fram á andúð í gagn samkynhneigðra hjá hinum trúfélögunum (er Gnarr ekki kaþólikki, for crying out loud?!) og klippa á styrki til þeirra líka.

    Við erum því sammála um að það sé furðulegt að neita að styrkja eitt trúfélag. Tökum styrkina af þeim öllum og veitum í leikskólakerfið, svona svo eitthvað sé nefnt.

  2. Tja, mér finnst reyndar mjög erfitt fyrir Reykjavíkur að verja það að veita styrki, styrki sem ekki eru lögbundnir, til aðila sem beinlínis vinna gegn mannréttindastefnu borgarinnar. Svo er það aftur önnur spurning hvort ekki þurfi að fara yfir fleiri styrki borgarinnar á þessum forsendum.

  3. Mér finnst þessi rök, að yfirlýsingar forstöðumanns trúfélagsins standist ekki mannréttindastefnu borgarinnar, ekki ganga upp. Af hverju er það issue núna varðandi Kristskirkjuna en ekki þegar um er að ræða önnur trúfélög sem hafa í reynd sömu afstöðu til samkynhneigðra?

    Og mér finnst það líka eiginlega ekki ganga að borgin sé til í að styrkja félag X en ekki félag Y af því að félag Y hefur skoðanir sem embættismönnum hjá borginni líkar ekki og telja ekki samrýmast stefnu sem borgin hefur sett sér. Alveg óháð því hversu ömurlegar þessar skoðanir eru þá er þetta í besta falli á gráu svæði finnst mér. Þetta er ekki góð stjórnsýsla, mig grunar að þetta gæti jafnvel verið ólögleg stjórnsýsla ef á það væri látið reyna.

    Það verður aldrei klippt á þessa styrki til Kaþólska safnaðarins eða ríkiskirkjunnar á meðan þeim er ennþá úthlutað. Það eru nefnilega stöndugir söfnuðir sem fólkið í borgarstjórninni tilheyrir. Það er svolítið það sem er í gangi þarna líka. Kristskirkjan er lítill jaðarsöfnuður sem hefur engar tengingar inn í borgarstjórn eða borgarkerfið.

    Eins og ég segi, skoðanir Friðriks eru ömurlegar. En borgin þarf að rökstyðja þessa ákvörðun sína talsvert betur en hún hefur gert að mínu mati.

  4. Get ég tekið einhver lyf sem halda mér sofandi/lifandi þangað til trúarbrögðin eru hætt að skipta almenning nokkru máli? Þau eru að missa fótfestu með hverri kynslóðinni sem líður, það bara gerist of hægt til að skipta okkur eða hverja staka kynslóð miklu máli.

    Og já, að úthýsa einum trúsöfnuði en ekki öðrum er hræsni. Þeir stunda allir fordóma á einn eða annan hátt.

Leave a comment

Netfang þitt verður ekki birt. Nauðsynlegir reitir eru merktir *