Þá hefst upprifjunarvikan mikla í tilefni af því að í dag er ár síðan ég hóf bloggmennsku. Við skulum byrja á að rifja upp fyrstu bloggfærsluna:
11. nóvember 2003
Jæja, þá er ég að byrja á blogginu mínu. Ég veit ekki einu sinni hvort ég þarf að setja dagsetninguna inn hérna? í dag er 11. nóvember. Ég á örugglega eftir að læra á þetta betur.
Ég var að hugsa um að segja eitthvað um öll þessi mótmæli þegar á að fara að byggja stór og falleg hús hér á þessu landi. Það er augljóst að mörlandinn er ekki orðinn neinn borgarfugl. Þetta er svona mó- og vallendislið sem vill halda í sveitasæluna (í Fossvoginum!). Mér finnast þessar nýju blokkir smart. Húsið sem á að byggja þar sem Austurbæjarbíó er er líka eitt af flottustu fjölbýlishúsum sem ég hef séð teikningar að. Verst að mótmælendurnir eru alltaf mun háværari en allt fólkið sem vill hlutina. Ég býst við að okkur hinum sé meira sama. Aldrei dytti mér í hug að halda fundi og berjast fyrir því að þessar blokkir verði byggðar. Hins vegar myndi ég kannski gera það ef ég teldi mig þurfa að mótmæla einhverju. Hvað getur maður lært af þessu? Jú, það á ekki alltaf að taka mótmæli mjög alvarlega. Þau eru yfirleitt mun háværari og meira áberandi en raunveruleg mótstaða í samfélaginu. (Væri ekki sniðugt að taka bara skoðanakönnun um þessar blokkir þarna í Lundi)?
Þarna er augljós byrjendabragur á. Slegið í og úr og markmiðið kannski frekar að segja eitthvað frekar en ekki neitt. í dag er ég alls ekki á því að þessar blokkir í Lundi hafi verið góð hugmynd. Reyndar ekki útivistarsvæði heldur. Þarna mætti byggja þétta byggð þriggjahæða húsa svipað og í Þingholtunum.
Þessi tími á síðasta ári var um margt ólíkur því að vera í verkfalli. Þessi færsla frá 14. nóvember lýsir erilsemi kennaralífsins.
14. nóvember 2003
Jæja. Þá er kominn föstudagur og vinnuvikan að fara að taka enda. Ég sendi ekkert inn í gær, enda var gærdagurinn með ólíkindum annasamur. Þannig að það var ekki ég sem setti hér upp Tag-board og tók það svo út þegar það virkaði ekki (íslensku stafirnir komu ekki). Það var ekki heldur ég sem setti upp þetta comments kerfi í staðinn. Nei, allt þetta á ég elskunni minni henni Gullu að þakka.
En aftur að gærdeginum. ístæðan fyrir öllum þessum önnum var sú að í dag var haldið upp á dag íslenskrar tungu á unglingastiginu (sjá skoðun mína á svona atburðum í pósti frá því á miðvikudaginn) og krakkarnir voru að útbúa myndband sem þau sýndu svo áðan. Það var svona í stíl við sjónvarpsþáttinn 70 mínútur og var bara virkilega skemmtilegt. En að þessu voru þau sem sagt að vinna þangað til klukkan 17 í gærdag. Þar að auki þurfti ég að fara á tvo fundi um eftirmiðdaginn (hvað er að verða um þetta kennarastarf)? í heildina fékk ég 25 mínútna hlé yfir daginn og það rétt dugði til að borða hádegismatinn. Þannig að ég var orðinn verulega úrvinda um kvöldmatarleytið.
En aftur að degi íslenskrar tungu. Það komu sem sagt allir skólarnir á Akureyri hingað og voru með ræðuhöld. Ath. ekki keppni! Það fannst mér sniðugt, enda tók ég sjálfur þátt í svona ræðukeppnum (já ég nota orðið keppni í fleirtölu!) þegar ég var í Menntaskólanum. Mín reynsla var sú að ef það var ekki því augljósara hvort liðið var betra urðu alltaf vandræði með dómgæslu, enda ræðumennska (og eflaust sitthvað fleira) þannig að nánast ógerlegt er að dæma hana hlutlægt. Eftir að hafa verið ræðumaður í fimm ár og síðan þjálfari og dómari í þessu öllu saman hef ég þannig snúist 180 gráður og finnst þetta núna með öllu fáránlegt.
Jæja, BB í B.
Ég lét þetta þó ekki nægja þennan dag því skömmu seinna fékk ég kynningarbækling um nýjan 5000 króna seðil og það er við hæfi að rifja upp hvað ég hafði að segja um hann í ljósi þess að nýlega kom samskonar bæklingur um nýja 1000 kallinn.
Ég fékk eins og allir aðrir, býst ég við, kynningarbækling um nýja 5000 kallinn inn um lúguna í dag. Ég verð að viðurkenna að ég átta mig ekki alveg á tilganginum með þessu og nýju öryggisþættirnir vefjast svolítið fyrir mér. Hefði ekki verið betra að láta svona nýjan 5000 kall fylgja með svo maður gæti skoðað þetta betur?
Svo byrjuðu jólin náttúrulega í nóvember eins og alltaf og ákveðin stemming að nöldra út af því. Halldór ísgrímsson var líka að klikka á Hringadróttinssamlíkingunum og mér fannst tilvalið að hnýta í það.
19. nóvember 2003
Aftur eru jólin að byrja alltof snemma. Það kvarta allir og kveina yfir Þessu en samt breytist þetta aldrei. Færist bara framar ef eitthvað er. Eiginlega orðinn hluti af jólastemmingunni að kvarta svolítið yfir þessu jólastressi í nóvember.
Rifjaðist upp fyrir mér um daginn þegar Halldór ísgrímsson tók Hringadróttinssögu líkinguna sína fyrir kosningar og klúðraði fræðunum svo gjörsamlega að ljóst var að hann hafði aldrei lesið þessa bók. Greip bara titilinn Turnarnir tveir og sneri því upp á Samfylkingu og Sjálfstæðisflokk. Sjálfur tók hann sér hlutverk Fróða. Hann áleit augsýnilega að turnarnir væru ísarngerði og Mordor, hvort tveggja tákngerfing hins illa. Turnarnir voru hins vegar annars vegar Minas Tirith, höfuðborg Gondor og útvörður frjálsra manna gegn ofurveldi Mordors og hins vegar Minas Morgul, höfuðvígi hringvomanna sem gengu erinda Saurons hins illa. Það er spurning um það hver gangi þeirra erinda í íslenskri pólítík. Helst dettur manni í hug ríkisstjórnin og hundsháttur þeirra gagnvart stríðsrekstri Bandaríkjanna. Það þýðir að stjórnarandstaðan er Minas Tirith en mér finnst það heldur mikið lagt á mjóar herðar. Sé að minnsta kosti engan þar sem er nokkur Gandalfur. Kannski er Stebbi Páls Fróði? Hann hefur a.m.k. krullurnar!
Þetta fór ég sem sagt að rifja upp meðan ég var að lesa nýju Harry Potter bókina fyrir strákana. Það var eitthvað við Voldemort sem minnti mig svo sterkt á Sjálfstæðisflokkinn og Lucius Malfoy bara hlýtur þá að vera Hannes Hólmsteinn Gissurarson. Galdramálaráðuneytið er líka dæmigerður Framsóknarflokkur og Cornelius Fudge er mun líkari Halldóri ísgrímssyni en Fróði nokkurn tímann. Þarna reyndar endaði þessi samlíking því eins og áður var erfitt að finna stjórnarandstöðuna þarna. Er Hogwart Samfylkingin og Fönixreglan Vinstri-Grænir? Eða er Fönixreglan Samfylkingin og Harry, Ron og Hermoine Vinstri-Grænir? Steingrímur, Ögmundur og Katrín! Eða eru þau kannski Frjálslyndir? Er Hermoine Granger Ingibjörg Sverris? A.m.k. er Lúna Lovegood örugglega Kolbrún Halldórs.
Seinna þennan sama mánuð fannst mér stórskemmtilegt að lesa veftímaritin Múrinn og Kreml og hér er ástæðan:
25. nóvember 2003
Ég get nú bara ekki orða bundist af kæti. Ég var að lesa svo skemmtilegar greinar á Kreml og Múrnum.
Á Kreml er ráðist á Davíð Oddson af offorsi. Af hverju? Jú, af því að hann réðst á stjórnendur Kaupþings-Búnaðarbanka. Á Kreml s.s. lesa þeir yfir hausamótunum á Davíð með tilvitnunum í Passíusálmana um að menn eigi ekki að rjúka til og dæma aðra. Meira að segja ásaka þeir hann um hræsni! Það hljóta fleiri en ég að sjá kaldhæðnina í þessu og vera skemmt.
Á Múrnum er hins vegar verið að fjalla um Flauelsbyltinguna í Georgíu og henni fundið flest til foráttu. Edvard Shevardnadze hafi jú verið réttkjörinn forseti landsins. Að vísu viðurkennir greinarhöfundur að það hafi verið vegna kosningasvindls en segir engu að síður að það sé alls ekki víst að Saakashvili, leiðtogi stjórnarandstöðunnar, hefði unnið annars. Það s.s. skiptir öllu máli fyrir þá Múrverja hvort það eru vinstri- eða hægrimenn sem svindla í kosningum. Annars veit ég ekki hvort Shevardnadze geti talist vinstrimaður en hann er a.m.k. fyrrverandi kommúnisti og þá finnst Múrverjum óverjandi að gagnrýna hann.
Eitthvað fannst Sverri Jakobssyni ég hafa misskilið grein hans um Shevardnadze og það getur vel verið að svo hafi verið. Þess vegna tók ég mig til og skrifaði heila ritgert um stjórnmál í Georgíu og birti 27. nóvember. Hún er hings vegar svo löng og þurr lesning að ég nenni ekki að birta hana aftur. Þið getið bara flett henni upp undir Gamalt ef þið viljið.
Læt ég þá þessari upprifjun á nóvembermánuði síðasta árs lokið. Upprifjunarvikan heldur áfram á morgun en þá verða heitustu málefni desembermánaðar 2003 tekin fyrir.
Góðar stundir.