Enn er haldið áfram með upprifjunarvikuna og ekkert dregið undan frekar en fyrri daginn.
Við byrjum strax eftir áramót og förum yfir reglur þær sem gilda um skil og skipti á jólagjöfum:
2. janúar 2004
1. Ef maður fær tvennt af einhverju má skipta öðru eintakinu fyrir hvað sem er.
2. Fötum sem passa ekki má skipta fyrir eins föt í réttri stærð (þó er heimilt að fá flíkina í öðrum lit ef vill).
3. Óheimilt er að skipta gjöf af þeirri einföldu ástæðu að manni langi frekar í eitthvað annað.
4. Sé manni gefið eitthvað sem þykir annað hvort skelfilega smekklaust eða alger óþarfi má stinga því inn í geymslu þar sem það sést ekki en þetta er ekki næg ástæða til að skipta gjöfinni.
5. Snyrtivörum (rakspíra, ilmvötnum o.s.frv.) er heimilt að skipta fyrir þá lykt sem maður notar hafi maður fengið rangan ilm.
6. Gjafir sem eru heimatilbúnar ber að þakka fyrir sérstaklega hversu ömurlegar sem þær eru (þetta snýr reyndar ekki að skiptum enda ómögulegt að skipta heimatilbúinni gjöf).
Svo var náttúrulega vinnan að byrja svona eftir jólin og fyrsti dagurinn var náttúrulega alveg óstjórnlega áhugaverður:
5. janúar 2004
Þá er fyrsti vinnudagur ársins búinn. Bara svona stutt í upphafi til að koma sér í gang. Samt fannst mér svolítið skrýtið að hefja misserið svona á því að hafa fyrirlestur og fund frá 8:30 – 12:30 svona í staðinn fyrir að gefa okkur tíma til að undirbúa kennsluna. Fyrst var fyrirlestur um Uppbyggingarstefnuna. íkaflega áhugavert. Ég ætla að leyfa mér að birta hér hluta af lesefninu sem fylgdi fyrirlestrinum. Hér er vísindaleg útskýring á innri áhugahvöt: „Hún hjálpar okkur að skilja það, hvernig manneskjan leitast stöðugt við í ákveðnum tilgangi og á mörgum vitundarstigum, að ná markmiðum sínum og fullnægja þörfum sínum í síbreytilegu umhverfi.“ Það var nú einmitt það. Um Uppbyggingarstefnuna er einnig sagt: „Hægt er að tala þannig um aðferðina sérstaklega og bera saman við aðrar uppeldisaðferðir og segja að hún sé lífsgildismiðuð fremur en reglumiðuð.“ Gott að hafa það á hreinu. Samt er náttúrulega stórkostlegast að lesa þetta: „íherslan færist frá ótta til óttaleysis, frá ytri stjórn til innri stjórnar, frá ytri hvatningu til innri hvatningar, frá umbun og refsingu til eigin lausnar á vanda, frá talhlýðni til sjálfsaga, frá reglum til lífsgilda, frá skömm til hugprýði, frá útskúfun til endurkomu og sátta, frá vonleysi og uppgjöf til sjálfstrausts og bjartsýni.“ Vá! Allt þetta er einungis að finna á fyrstu blaðsíðu þessa fjögurra síðna dreifildis sem heldur áfram á svipuðum nótum.
Stærsta fréttin í janúar var svo náttúrulega þegar Dóri Gríms þrælapískari, mannhatari og mannvitsbrekka fann upp á sitt einsdæmi öll gereyðingarvopnin í írak:
15. janúar 2004
Til að byrja með er hún alveg bráðskondin þessi frétt af gömlu sprengihylkjunum sem Danir fundu í Suður-írak um daginn. Frá upphafi var ljóst að þetta voru gömul sprengihylki frá íran-írak stríðinu sem var búið að setja til hliðar og meira að segja nota í undirstöður vega (þetta virðist nú vera talsvert ítarleg leit hjá þeim ef þeir eru farnir að grafa vegina í sundur). Þessu hampaði Halldór ísgrímsson sem heimsviðburði! Merkilegt að Utanríkisráðherra þjóðarinnar sé svo vel að sér í heimsmálunum að vita ekki að svona tóm sprngjuhylki (eða með einhverju glundri í) finnast í írak nánast á hverjum degi og er ekki haft hátt um það þar sem þeir fengu þær flestar (eða glundrið í þeim) frá Bandaríkjunum og Bretlandi. Það voru heldur ekki þessi vopn sem menn áttu við þegar talað var um gereyðingarvopnin í írak. Það vissu allir að Saddam hafði notað efnavopn á írani og Kúrda. Það var bara öllum sama, þ.m.t. Halldóri ísgrímssyni.
Svo voru líka kosningar í Færeyjum:
21. janúar 2004
í útvarpinu í gær var verið að tala við fréttaritara útvarpsins í Færeyjum og ljóst að útvarpsmaðurinn gat ómögulega skilið hvernig stæði á því að allir Færeyingar kysu ekki flokkana sem eru að berjast fyrir sjálfstæðinu. Fréttaritarinn var einnig dyggur stuðningsmaður Anfinns Karlsberg og á honum mátti skilja að maðurinn væri nánast dýrlingur þrátt fyrir einhverja fjármálaglæpi fyrir 22 árum síðan. „Allt slíkt er auðvitað löngu fyrnt.“ sagði fréttaritarinn og virtist ekkert skilja í því afhverju maðurinn hefði verið að segja af sér. „Hann skilar mjög góðu búi.“ voru ummæli fréttaritarans. Á fréttum Stöðvar 2 í morgun var hins vegar að skilja að núverandi stjórnvöld hefðu klúðrað efnahagsmálum Færeyja en haldið velli þrátt fyrir það væntanlega vegna þess að naumur meirihluti Færeyinga er hlynntur sjálfstæðisbaráttunni. Hvor túlkunin er rétt veit ég ekki en hitt er áhugavert hvað þessi sjálfstæðisbarátta Færeyinga virðist skipta okkur Íslendinga miklu meira máli en þá sjálfa.
Smá hugleiðing líka þegar fór að líða að Bóndadegi:
23. janúar 2004
Konur, ef þið elskið mennina ykkar ekki gefa þeim blóm! Karlmenn vilja ekki fá blóm á Bóndadaginn. Viðurkennið það líka ef þið kaupið blóm þá eruð þið að kaupa þau fyrir ykkur sjálfar.
Eitthvað var ég líka að hugsa um stjórnmálin á Bretlandseyjum og hafði þetta við þau að athuga:
28. janúar
Þá er Blair sloppinn fyrir horn og búinn að eyðileggja breska skólakerfið og brjóta sitt helsta kosningaloforð. í fréttunum á Stöð 2 í morgun var það kallað óáhugavert mál! Það er skelfilegt til þess að hugsa að þetta er maðurinn sem Össur og Ingibjörg líta upp til sem leiðtoga lífs síns.
Að lokum vil ég segja að mér finnst ákaflega þægilegt að upprifjunarvikuna skuli bera upp akkúrat núna og ég þurfi því ekki að segja frá því sem mér raunverulega býr í brjósti þessa dagana. Ég er bara ekki reiðubúinn til þess ennþá.
Kennarar í Giljaskóla ætla að hittast kl. 17 í dag, stjórn BKNE ætlar að hittast í kvöld þegar varaformaðurinn kemur aftur norður af formannafundinum í Reykjavík, svo ætlum við að hafa trúnaðarmannafund á morgun og þá vonandi kemur í ljós hvað hægt verður að gera.
Ave