Nú er ég í sjálfu sér ekkert á móti stóriðju. Ég held bara að það sé komið nóg af henni á Íslandi, sérstaklega af áliðnað og þá sérstaklega á vegum RioTinto. Mér finnst í sjálfu sér allt í lagi að auka framleiðslu í Straumsvík (Það var kosið um stækkun svæðisins sem álverið er á, ekki aukna framleiðslu innan þess svæðis sem álverið hefur núna svo ég sé ekki að það þurfi neinn að amast við því). Til að svo megi verða þarf að virkja einhvers staðar. Nú lofaði Samfylkingin því að ekki yrði ráðist í fleiri virkjanir fyrr en búið væri að gera úttekt á öllum svæðum sem hægt er að virkja og ákveða hver þeirra ætti að friða. Síðasta ríkisstjórn var hins vegar búin að framselja allt skipulagsvald til sveitarfélaganna áður en hún lét af störfum. Helsta tæki ríkisstjórnarinnar til að geta stöðvað stóriðjuframkvæmdir er því samþykkt væntanlegs landskipulags sem umhverfisráðherra vill leggja fram en mætir mikilli andstöðu innan Sjálfstæðisflokksins.
Núna nýverið er svo búið að veita einhverjum fjármunum í leit að heitu vatni á svæðum sem hingað til hafa þurft að reiða sig á rafmagnshitun. Ef það skilar árangri losnar um mikla raforku sem hefur þurft til húshitunar, næga að því er mér skilst til að knýja aukna framleiðslu í Straumsvík og meira til.
Hins vegar er ég ekkert á móti því að virkja þegar búið er að gera úttekt á virkjunarkostum og velja þá staði sem helst koma til greina. Ég efast ekki um að þ.á.m. verður neðri hluti Þjórsár og Kröflusvæðið. Langisjór, Þjórsárver o.fl. staðir verða hins vegar vonandi friðaðir. Ég tel líka að þá raforku ætti að nýta öðruvísi en að selja hana á útsöluverði til vafasamra álrisa sem samkvæmt nýjustu fregnum flytja allan hagnaðinn úr landi. Af hverju eru engin íslensk fyrirtæki spennt fyrir því að kaupa álverin sem búið er að reisa hér á landi? Skila þau ekki nógu miklum hagnaði? Eru þau of dýr?
Ég er því frekar fúll út í Björgvin fyrir að taka skóflustungu að nýju álveri í Helguvík og út í Össur fyrir að skrifa undir viljayfirlýsingu um nýtt álver á Bakka. Ég sé hins vegar ekki að það sé neins staðar búið að ákveða virkjanir fyrir þessi nýju álver og í „Fagra Íslandi“ fólst ekki að aldrei yrði virkjað framar á landinu. Það er hins vegar ótækt að gera það til að geta selt orkuna á undir-brasílísku verði til óprúttins álrisa sem hefur verið borinn mjög alvarlegum sökum, m.a. um illa meðferð á ómenntuðum verkamönnum, mútur og jafnvel að hafa ráðið málaliða til að ganga á milli bols og höfuðs á verkalýðsforkólfum.