Nýkominn úr sundi hress og kátur (og hreinn). Búinn að taka niður af snúrunni, hengja út þvottinn og setja í nýja vél. Á leiðinni í Sorpu og Bónus. En fyrst:
í fyrsta lagi: í útvarpsauglýsingum frá Flytjanda eru ökumenn hvattir til að haga sér vel í umferðinni og gefa merki þegar öllu er óhætt. Núna er ég búinn að leita út um allt í bílnum mínum og finn hvergi svona merki. Ég finn viðvörunarljós til að gefa merki ef eitthvað er að, þokuljós, beygjuljós, bremsuljós og meira að segja viðvörunarþríhyrning í skottinu en svona öllu óhætt merki finn ég ekki. Á maður kannski að keyra bara endalaust með svona „thumbs up“? Nú er yfirleitt öllu óhætt nema þegar eitthvað er að og þá eru til merki fyrir það.
í annan stað: Þá er týsdagsfréttablaðið ekki enn komið! Mánadagsblaðið kom ekki heldur en það var allt í lagi því ég fór hvort sem er í Bónus í gær og hirti eintak þar. Ég ætla reyndar líka í Bónus í dag því mágur minn er að koma í kaffi í kvöld og ég ætla að hræra í vöfflur o.þ.h. Maður á samt ekki að þurfa að ná í Fréttablaðið í Bónus. Þetta er borið út hér á Akureyri. Samt einhvern veginn kann maður ekki við að kvarta yfir einhverju sem er ókeypis. Ef það kemur ekki áður en ég fer í búðina ætla ég samt að hringja í Fréttablaðið.
í þriðja lagi: Þá hætti lyklaborðið á tölvunni minni að virka áðan þegar ég var að fara að blogga og ég þurfti að endurræsa hana. Þetta er hvimleitt. Sérstaklega í ljósi þess að hún er nýkomin frá lækni, þ.e. mági minum sem er ekki mágur minn sem kemur í kaffi í kvöld þó hann gæti svo sem komið líka ef hann nennir. Ég held ég fari að skipta yfir í Linux og Opera. Það segja mér nördar (þ.e. mágur minn sem læknaði tölvuna en ekki sá sem er að koma í kaffi í kvöld þó svo hann gæti náttúrulega kíkt með bróður sínum sem ég á þó kannski ekki endilega von á) að það sé mikið betra og traustara.
í fjórða stað: Þá er þessi upptalning farin að minna óþægilega á tjúgskeggjaðan stjórnmálamann sem sjaldan hefur ríkt lognmolla í kringum en fáir meta þó að verðleikum.