Þá er Eurovision að byrja í kvöld með fyrstu undankeppninni hér á landi. Ég er ekki viss um að ég styðji þetta fyrirkomulag að hafa undankeppnir eða þá að hafa þær sem stærstar og viðamiklar. Reynslan hefur sýnt að lögum úr þessum undankeppnum gengur yfirleitt illa í aðalkeppninni. í þessu er ég fylgjandi hinum upplýsta einvaldi sem velur lagahöfund og flytjanda sem sendur er fyrir okkar hönd. Það fyrirkomulag hefur verið reynt hér á landi og gefist betur en hitt þó hvorugt hafi skilað miklum árangri ef undanskilin er för Selmu til Jerúsalem árið 2000 (eða var það 1999)?
Hins vegar hef ég heyrt í útvarpinu í gær og í morgun þrjú af þeim átta lögum sem eiga að keppa í kvöld og verð að segja eins og er að þau eru öll ákaflega leiðinleg. Ég vona að ég hafi heyrt þrjú lélegustu lögin fyrir hreina tilviljun. Þetta sem hreimur söng var skást af þeim sem ég heyrði en er þó álíka grípandi og þunglyndishljóðhryna með Sigurrós.
Undir eðlilegum kringumstæðum hefði ég hugsanlega bloggað um þetta um leið og ég bloggaði um HM í handbolta áðan en með þessu móti get ég fjölgað bloggfærslum og unnið mig út úr þeim ógöngum sem ég kom mér í í gærkvöldi með því að heita því að blogga 20 sinnum yfir helgina. (Sem ég ákvað vegna þess hvað ég hef ákaflega lítið bloggað í janúar). Ég er að hugsa um að búa til nýja undirflokka undir tvö síðustu blogg, þ.e. menning og íþróttir. (15)