Besti bloggarinn ver miklum tíma í að fylgjast með breskum stjórnmálum. Raunar fáránlega miklum tíma og orku. Á hverjum degi renni ég yfir helstu fregnir í 5-6 breskum blöðum á netinu og les greinar eftir helstu pistlahöfunda og leiðara sumra blaðanna. Já, ég veit að þetta nálgast þráhyggju…
Eftir að hafa fylgst með fréttum undanfarna daga er ég loksins farinn að trúa því að forsætisráðherraferill Blairs sé senn á enda. Sjálfseyðingarhvötin er slík og málefnið sem hann velur til þess er með ólíkindum – skólagjöld í háskólum.
Margét Thatcher framdi pólitískt sjálfsmorð með nefskattinum á sínum tíma og var þó miklu sterkari fyrir en Blair nú. Nefskatturinn, þótt galinn væri, var hins vegar í samræmi við stefnu íhaldsflokksins. Það var gert ráð fyrir honum í kosningastefnuskrá íhaldsmanna. Skólagjaldafrumvarp Blairs er hins vegar í hrópandi mótsögn við stefnu Verkamannaflokksins og á sér enga hugmyndafræðilega réttlætingu aðra en þá að leyfa íhaldinu ekki að vinna.
Atburðir næstu daga munu skera úr um það hvort Blair verður enn á stóli forsætisráðherra eftir 2-3 mánuði. Ef ég ætti að veðja, þá myndi ég fremur giska á að hann hrökklist burt.
– Var þessi færsla kannski brot á prinsippi mínu að blogga ekki um pólitík?
* * *
Fram tekur á móti HK í bikarnum í kvöld í fjórðungsúrslitum bikarsins. Nú reynir á!