Nú er Jólahjól með Sniglabandinu hugsanlega versta lag í heimi. Nú er búið að breyta því í Húsasmiðjuauglýsingu, sem þar með er orðin versta útvarpsauglýsing í heimi. Jólalög tröllríða í útvarpinu. Maður er helst óhultur á Rás 2 í einhverja daga í viðbót. Svo verður það bara Skonrokkið.
Útvarp Saga er orðin skringilegasta útvarpsstöð landsins. Barflugurnar frá Vitabar raðast í öll störf. Gef þessu tvo mánuði áður en nýir eigendur taka við og stöðinni breytt í tónlistarstöð á ný.
# # # # # # # # # # # # #
Á kvöld samdi ég 192. víxlspurninguna fyrir útvarpskeppni Gettu betur á næsta ári. Markmið mitt var að semja þennan fjölda fyrir lok nóvember og að tókst naumlega. Til viðbótar við þetta er ég kominn með vænan slurk af hraðaspurningum.
Með þessu er ég kominn með allar víxlspurningar fyrir útvarpshlutann að hljóðdæmum einum undanskildum, miðað við að keppnisliðin verði 32 og því 24 útvarpskeppnir. Víxlspurningum hefur fjölgað frá því sem verið hefur – þær verða átta í keppni í stað fimm áður, en í einum lið en ekki tveimur þess í stað. Þetta mun gera keppnina réttlátari. – Vitaskuld á ég þó eftir að vinna í þessum spurningum meira og semja t.d. fréttatengdar spurningar dagana fyrir keppni, en það er líka nauðsynlegt að eiga nokkrar auka. Miklu fargi er af mér létt úr því að þessum áfanga er náð.
Framkvæmdaáætlunin er þessi:
Semja myndspurningar fyrir sjónvarpskeppnina fyrir 24. desember, að langmestu leyti. Það eru 70 spurningar í allt, þar á meðal vísbendingaspurningar. Samhliða því ætla ég að reyta inn fleiri hraðaspurningar og raða upp útvarpskeppninni.
Milli aðfangadags og þrettándans, semja tóndæmisspurningar fyrir útvarpskeppnina. Eftir að keppni hefst í útvarpi c.a. 10.janúar, semja myndefnislausu sjónvarpsspurningarnar.
Þetta verður fjandi stíft. Það er nokkuð ljóst að kvöldin og helgarnar verða ásetin í desember.
# # # # # # # # # # # # #
Námskeiðið um mætingastjórnunina var langt – of langt. Þar voru þó fínir sprettir – einkum þegar leiðbeinandinn gerði stólpagrín af sumum þeim atriðum sem talin eru mikil stjórnunarleg dyggð innan Orkuveitunnar. Óskaplega finnst mér ég þó hafa farið á mörg millistjórnendanámskeið þar sem fyrirlesarar með power point prédika nauðsyn þess að hrósa fólki…
# # # # # # # # # # # # #
Tilvitnun dagsins:
„Þið eruð ekkert betra fólk en ég!“ – hinn djúpvitri pulsumálaráðherra gerir hróp að andstæðingum íraksstríðs á Austurvelli.
Jamm.