Það er víst til einhver áfengisgosdrykkur sem einkum er stílaður upp á unglingsstelpur sem heitir HOOCH. Ef menntaskólaefnafræðin svíkur mig ekki, þá er HOOCH efnafræðiheitið á maurasýru. Mér skilst að það sé líka til drykkur sem heitir HIV. Það er annað hvort áfengisgos eða orkudrykkur – eða jafnvel hvort tveggja, það þykir víst voða sniðugt saman.
Er það dæmi um postmódernískt ástand að sakleysislegir drykkir heiti ónefnum? Á sama tíma má ganga að því sem vísu að hreinsiefni heita því sakleysislegri nöfnum sem innihald þeirra er banvænna. íður en við Steinunn skiptum út baðherberginu, þurfti reglulega að hella Gretti sterka oní niðurfallið á sturtubotninum. Grettir sterki var algjör vibbi. Mogginn hefði rutt forsíðuna ef einhverjir Íslendingar hefðu rambað á brúsa af þeim lút suður í írak.
Á þessum skrifuðum orðum liggja rimlagardínur heimilisins í baðkarinu, þar sem þær hafa verið maríneraðar í Þjarki, sem er blanda af mörgum háskalegum sýrum. Þessu skola ég svo glaðbeittur út í holræsin sem aftur skila ósköpunum út í sjó. Tvítóla marhnútarnir í höfninni kunna mér væntanlega litlar þakkir.
# # # # # # # # # # # # #
Kara Swanson, doktorsnemi frá Harvard er á leiðinni til landsins og ætlar að halda fyrirlestur á morgun. Hún stoppar í eina nótt á skerinu og gistir á Mánagötunni, að beiðni Skúla. Mér sýnist þetta muni kalla á orlofsdag í vinnunni á morgun og svo verði vaknað fyrir allar aldir miðvikudagsmorguninn og keyrt suður til Kebblavíkur. Hverjum dettur í hug að stoppa bara eina nótt á leiðinni milli Ameríku og Evrópu – OG að ætla að koma fullt af hlutum í verk. Þetta er ekki manneskja sem óttast þotu-þreytu…