Hvílík helgi í forkeppn í HM!
Fyrir helgina var mögulegt að nýliðar kepptu í úrslitakeppninni fyrir hönd Afríku úr fjórum af fimm riðlum. Túnis, sem virðist öruggt um sigur í fimmta riðli voru einu reynsluboltarnir sem öruggir töldust.
Fílabeinsströndin var með örlög sín í eigin höndum, en tapaði á heimavelli 2:3 gegn Kamerún – þar sem jafntefli hefði verið nóg. Kamerún virðist því eiga greiða leið í úrslitin, rétt eina ferðina.
Togo missteig sig ekki heima gegn Líberíu og dugar jafntefli í erfiðum útileik gegn Kongó til að skiljla Senegal eftir í 1. riðli. Það er magnað að Togo sé á leiðinni til Þýskalands. Því hefði enginn trúað fyrir ári eða tveimur.
Suður-Afríka má heita úr leik eftir tap á útivelli gegn Burkina Faso. Gríðarlega óvænt úrslit sem þýða að Ghana er á leiðinni í úrslit. Það er hins vegar mikið áfall fyrir Suður-Afríkumenn að sitja heima fjórum árum áður en liðið hýsir HM 2010.
Óvæntast af öllu er þó að sjá Angóla í efsta sæti 4.riðils. Þegar ein umferð er eftir dugar Angóla sigur á útivelli gegn Rwanda til að komast áfram og ef Nígería tapar gegn Alsír í kvöld eru úrslitin þegar ráðin.
Á Asíu sigraði Úsbekistan fyrri leikinn í einvíginu við Bahrain, 1:0 á heimavelli. Er það nóg til sigurs? Það lið sem hefur betur í þeirri rimmu mætir líklega Guatemala eða Trinidad & Tobago. Ekkert þessara liða hefur áður komist í úrslitakeppni. – Það verður því enginn hörgull á nýjum úrslitaliðum næsta sumar.