Þegar ég var smápjakkur þótti Skúli Óskarsson sá allra flottasti. Hann var Íslendingurinn sem átti heimsmet – og eðlilega var hann settur á forsíðu heimsmetabókarinnar. Á ÓL 1980 í Moskvu lenti hann ofarlega, 4-5 sæti ef ég man rétt – það þótti auðvitað frábær árangur.
Síðar urðu kraftlyftingar að feimnismáli. Lyfjanotkun var sögð landlægt vandamál í greininni og kraftadella Íslendinga fékk í staðinn útrás í aflraunakeppnum, einkum eftir að Jón Páll & co. hrökkluðust út úr íSí. Beinar útsendingar í íþróttaþætti Sjónvarps frá kraftlyftingamótum í andyri Laugardalshallar heyra sögunni til.
Þess vegna varð ég undrandi að frétta af nýja heimsmethafanum íslenska, Benedikt Magnússyni, sem stórbætti heimsmetið í sínum þyngdarflokki í réttstöðulyftu. Það var engin Bubka-bragur á þessu hjá honum, heldur sló hann fyrst metið og bætti það síðan um fjórtán kíló!
Nú erum við Íslendingar einatt að spá í því hvernig við getum unnið til verðlauna á Ólympíuleikum. Allir sundmenn sem eiga séns á að komast í milliriðla á góðum degi eru teknir og settir á úrvalsstyrk. Fermingarbörn sem geta kastað kúlu eða spjóti eru látin æfa í sérstökum ÓL-hópum sem eiga að blómstra eftir 8 til 12 ár og svo mætti lengi telja.
En hvað með þennan Benedikt? Er ekki miklu raunhæfara að vonast til þess að hann skili okkur hinu langþráða ÓL-gulli 2008 heldur en að veðja á hondboltalandsliðið, Rúnar á bogahestinum, frjálsíþróttaliðið eða borðtennisdrenginn?
Nú veit ég ekkert um lyftingar – en gefur ekki svona heimsmet tilefni til mikillar bjartsýni? Er ekki ástæða til að góðir menn dæli peningum í drenginn til að hann geti einbeitt sér að því að drekka lýsi og bryðja steðja næstu árin? Á næsta ári verður silfurpeningurinn hans Vilhjálms orðinn hálfrar aldar gamall. Við þurfum gullverðlaunahafa! Við þurfum nýjan Skúla Óskarsson!
# # # # # # # # # # # # #
Um helgina mætast Trinidad & Tobago og Bahrain í forkeppni HM. Ég held með Trinidad. Ef þetta eyríki með milljón íbúa kemst á HM, þá verður það væntanlega fámennasta ríkið sem þangað hefur komist. Býst við að Slóvenía eigi það met núna.
# # # # # # # # # # # # #
5. umferð Orkujarlsins hefst kl. 10 á eftir.