Tólf viðureignir af þrettán eru nú búnar í fyrstu umferð og enn hefur ekki komið keppni þar sem úrslitin lágu ekki svo að segja fyrir eftir hraðaspurningar. Það er merkilegt, en jafnframt afar gleðilegt fyrir gæði keppninnar. Ætla má að liðin sextán í 2. umferð verði öll meðal tuttugu bestu liðanna í ár.
Það sem stóð uppúr eftir kvöldið var frammistaða Menntaskólans á Egilsstöðum. Þau eru með frambærilegt lið sem á að fara í sjónvarpið. Reyndar gætu margir landsbyggðarskólar tekið frammistöðu ME í spurningakeppninni síðasta áratuginn sér til fyrirmyndar. Það er mikið afrek hversu góð Egilsstaðaliðin hafa oft verið ef haft er huga fámenni skólans og að útskrifaðir nemendur fara yfirleitt beint suður í Háskólann og gagnast ekki til þjálfunar.
írmúlaliðið sem tapaði fyrir Héraðsbúum má bærilega við una sem langstigahæsta taplið fyrstu umferðar. En sannast sagna var þetta mjög létt keppni. VMA og Norðfjörður voru hin tapliðin í kvöld með níu stig og tólf stig.
Hraðbraut og Suðurland verða í hattinum á morgun. Um þau er svo sem fátt að segja. Reyndar er erfitt að leggja mat á styrk margra liða á grunni fyrstu umferðarinnar. Sum þeirra liða sem eru að vinna sínar viðureignir og taka u.þ.b. 20 stig eru bara að innbyrða „léttu“ stigin, en gera það þokkalega. Fyrr eða síðar rekast þessi lið hins vegar á vegg. Það getur gerst í 2. umferð ef spurningarnar þyngjast örlítið – eða í sjónvarpinu þar sem bjöllufyrirkomulagið gerir það að verkum að þau taka engin stig nema eitthvert smotterí í hraða.
MH og Hvanneyri mætast á morgun í lokakeppni 1. umferðar. Þar mun Hamrahlíð vinna, með fyllstu virðingu fyrir því ágæta fólki í starfsmenntabrautinni á Hvanneyri – sem er líklega besta GB-liðið… miðað við höfðatölu.
Landið virðist mér liggja svona:
MR og Versló eru best.
MH, Borgarholtsskóli og kannski MA (stórt spurningamerki) koma þar á eftir
MS, MK og ME ættu svo að taka þrjú síðustu sætin á topp-8 listanum (tveir fyrrnefndu skólarnir þó fremur á grunni þess sem þeir eiga að geta, frekar en hvað þeir hafa sýnt.)
Lið sem falla naumlega fyrir utan þennan hóp væru þá helst FG og Kvennó. Jafnvel ísfirðingar með smáframförum.
# # # # # # # # # # # # #
Luton seldi Vine. Andskotinn. Nú verður það rosalega erfitt að hanga í deildinni.
Það er oft erfitt að halda með blönku fótboltaliði.
# # # # # # # # # # # # #
Á laugardaginn verður boðið upp á kennslu í meðferð hljókerfis SHA. Sjá: þessa frétt. Eftir laugardaginn verð ég margs vísari um græjur og verð búinn að læra lingóið.
Skrúfum niður í Moggablogginu!