Það er vægast sagt erfitt að henda reiður á rússneskum stjórnmálum. Einhvern veginn finnst manni nýir flokkar skjóta upp kollinum í sífellu, meðan aðrir skipta um nöfn eða sameinast. Eitt árið virðist einhver flokkurinn njóta gríðarmikils fylgis – en örskömmu síðar mælast þeir í sárafáum prósentum.
Þegar bornar eru saman fréttaskýringar um rússnesk stjórnmál í íslenskum fjölmiðlum annars vegar en í breskum, bandarískum eða skandinavískum fjölmiðlum finnst mér ég verða var við greinilegan mun varðandi eitt atriði – Garry Kasparov.
Auðvitað er sagt frá stjórnmálavafstri Kasparovs í breskum og bandarískum blöðum – og þess getið að hann sé heimsfrægur skákmeistari (nokkuð sem er algjör óþarfi að minna Íslendinga á) – en sú umfjöllun er fremur á þeim nótum að þetta sé sniðugt kjúríosítet frekar en að Kasparov sé kynntur til sögunnar sem sérstakt afl í rússneskri pólitík.
Nú getur vel verið að þessi tilfinning mín sé vitlaus – en getur ekki hugsast að sú staðreynd að Íslendingar eru vitlausir í skák og vita flestum þjóðum meira um skákmeistara og alþjóðleg skákmót, hafi áhrif á þetta fréttamat?
Á sama hátt grunar mig að íslenskir fjölmiðlamenn geri Zírínovskí og flokki hans hærra undir höfði en kollegar þeirra í öðrum löndum vegna þess að við erum ennþá dálítið upp með okkur eftir að Zírínovskí hótaði Íslandi öllu illu fyrir 15 árum og vildi opna hér fanganýlendu smkv. einhverjum fréttum…