Af hverju eru íslenskir fjölmiðlar svona slappir þegar kemur að erlendum fréttum?
Fyrir nokkrum dögum fluttu þeir allir fregnirnar af björgun frú Betancourt og fleiri gísla frá FARC-hreyfingunni. Útgáfa kólumbíska hersins af atburðarásinni var rakin. Hún er nokkurn veginn á þá leið að hópi hermanna hafi tekist að blekkja skæruliðana með því að þykjast vera vopnabræður þeirra og fá gíslana þannig afhenta án átaka. Þessu til stuðnings var sýnt furðulegt myndband sem sýnir nokkra skæruliða gantast við hermennina og láta gíslana af hendi.
Síðan hefur lítið heyrst af þessu máli – fyrir utan einhverjar fréttir af því hvort Frakklandsforseti komi vel eða illa út úr þessari niðurstöðu heimafyrir.
Það þarf hins vegar ekki að leita lengi í erlendum fjölmiðlum til að sjá að fréttamenn eru ekki að kaupa skýringar Kólumbíustjórnar. Það virðist augljóst að frelsun gíslana var ekki afleiðing snjallrar leikfléttu hersins, heldur hafi ríflegt lausnargjald verið látið í skiptum fyrir þá.
Ég minnist þess hins vegar ekki að hafa séð múkk um þá hlið málsins í erlendu fréttunum hérna heima.