Famelían er flutt aftur inn á Mánagötuna eftir þriggja vikna útlegð. Biðin var þó ekki til einskis. Nú er komið þetta stórfína barnaherbergi og glæsilegt hillupláss fyrir bókalager heimilisins.
Barnaherbergið státar af bleikustu gluggatjöldum sem sést hafa, með Disney-myndum af Öskubusku, Mjallhvíti og þriðju prinsessunni. Nágrannar eru hér með beðnir afsökunar.
Grísinn harðneitar að hafa gluggatjöldin dregin frá. Hún vill hafa sína Mjallhvíti.
Við röðunina á bókunum lofuðum við Steinunn okkur að bíta á jaxlinn og fórna bókum vægðarlaust – ýmist í Góða hirðinn eða jafnvel á haugana. Þrátt fyrir stóru orðin rötuðu ekki nema 4-5 bækur í tunnuna (mestallt lúnar skræður og eitt bænakver fyrir börn) og Góða hirðisbækurnar rétt skriðu yfir tuginn. Kannski ekki frábær árangur miðað við allt þetta bókafargan – samt dauðlangar mig til að fiska nokkrar bækur aftur upp úr kassanum… Til dæmis steypist nú yfir mig löngun til að lesa Penguin-bókina með einni af minna þekktu skáldsögunum eftir C.S. Forester.