Rúmlega þriggja vikna frí að baki. Reykjavík í súld hefur sjaldan verið eins falleg og þegar komið var í bæinn um kvöldmatarleytið.
Það verður engin ferðasaga. Á mesta lagi brotakenndar hugleiðingar á næstu dögum. Annars skilst mér að bloggfrí séu í tísku núna. Kannski maður ætti bara að hætta til áramóta eða svo?
Leiðalýsingin er í sem allra fæstum orðum þessi: gist í tvær nætur að Bjargi hjá Ólínu tengdaömmu og Valda. Ekið á Tjörnesið og gist í eina nótt hjá Steina kúabónda. Keyrt fyrir Melrakkasléttuna með stuttri viðkomu í öllum smábæjum, stoppað á Borgarfirði eystri og gist í tvær nætur á ættarmóti. Haldið á Norðfjörð og stoppað í nokkra sólarhringa. Skotist niður á Breiðdal, gist hjá Nonna frænda og Guðrúnu á Þorgrímsstöðum og sveitarstjórahjónin heimsótt á Breiðdalsvík. Haldið aftur á Norðfjörð og stoppað fram yfir Verslunarmannahelgi. Gist eina nótt á Akureyri á heimleiðinni.
Tíðindi ferðarinnar: Ólína tók þroskakipp og talar sem aldrei fyrr. Barnið er líka búið að læra að mestu að sofa í eigin rúmi og þar með fækkar óvæntum nýrnaspörkum til muna.
Lærdómur ferðarinnar: Þótt Hellisheiði eystri sé flottasti fjallvegur landsins, þá verður Vegagerðin að grafa göng þarna undir.
Sérviskulegasta lesning ferðarinnar: Saga Eldeyjar-Hjalta II bindi e. Gvend Hagalín.
# # # # # # # # # # # # #
Gamla þriðja deildin, sem nú heitir fyrsta deild, byrjar um helgina. Luton mætir Hartlepool. Mér sýnist mínir menn einkum hafa keypt gömul brýni fyrir tímabilið – framherja sem komnir eru framyfir hálffertugt og annað í þeim dúr. Vonandi veit þjálfarinn hvað hann er að gera – eitt er víst að stjórn félagsins gerir það ekki…
Hvernig standa annars þessi kærumál varðandi Leeds? Stendur þessi fimmtán stiga frádráttur sem lofað var?
# # # # # # # # # # # # #
Komst í tekjublað Mannlífs. Bloggaði reyndar sjálfur um tekjurnar mínar daginn sem ég sendi inn skattframtalið og komst þar að aðeins hærri niðurstöðu en Mannlífsblaðamaðurinn. Reikna með að það gildi um fleiri.
# # # # # # # # # # # # #
Annað kvöld mæta allir góðir menn á kertafleytingu á Tjörninni kl. 22:30. Skítt með truntulega veðurspá. Síðustu 10 árin hefur alltaf snúist í gott veður á kertafleytingarkvöldum…
# # # # # # # # # # # # #
Á póstbunkanum sé ég mér til mikillar ánægju nýjasta eintakið af Technology and Culture. Þar eru m.a. greinar um sögulegan aðdraganda Ford T-módelsins og um vídeótækjavæðingu heimilanna. Kvöldlesningunni bjargað!
# # # # # # # # # # # # #
Moggabloggið? Þarf eitthvað að hnýta í það meira – er það ekki löngu dautt í hugum flestra?