Getur verið að skýringin á íslenska efnahagshruninu sé fundin – og svarið sé að finna í sakleysislegri smáfrétt á Vísi um dónaskap í framhaldsskólablaði?
Hér er frétt um skólablað í Versló sem fór víst yfir strikið í myndatextum.
Verzlunarskólinn hefur sem kunnugt er verið helsta uppeldisstöð íslenskra peningamanna, enda það skilgreint hlutverk hans að búa ungmenni undir störf í viðskiptalífinu. Eitt aðalstolt Verslinga hefur verið skólablaðið, sem vissulega hefur verið gríðarlega mikið að burðum og með fínni prentun. Það hefur þótt harlagott í ýmsum kreðsum að hafa stýrt Verzlunarskólablaðinu.
Fréttinni lýkur hins vegar á hugleiðingu um að nú séu breyttir tímar:
„Þegar Geir H. Haarde kom í sjónvarpið og sagði allt vera að fara til fjandans þá vorum við að fara í auglýsingasöfnun þannig að sú yfirlýsing var ansi mikið högg,“ segir Birgir. Af þeim sökum hafi verið gripið til þess ráðs að selja blaðið. „Og í fyrsta skipti í langan tíma er blaðið ekki að skila tapi fyrir nemendafélagið heldur stöndum við á sléttu og það er kannski helsta afrekið.“
Öhh… er staðan sem sagt orðin sú í helsta viðskiptaframhaldsskóla landsins, að það telst sérstakt afrek að gefa skólablaðið ekki út með tapi? Voru hnausþykku góðærisblöðin, sem voru troðfull af auglýsingum frá öllum helstu fyrirtækjum landsins, öll vitlausu megin við núllið?
Það er kannski ekki skrítið þótt viðskiptalífið íslenska hafi aldrei átt séns…