Annasamur dagur í gær. Fékk hóp af krökkum frá Danmörku og úr Garðinum í heimsókn – 10. bekkinga. Svo virðist sem kennarar séu farnir að fatta það almennt að í Rafheimum sé hægt að semja um að fá kennslu á dönsku/skandinavísku fyrir danska skiptinemahópa. Á þessu sem öðru gildir að rétti maður litla fingur er búið að hremma höndina á augabragði.
Á hádeginu brunaði ég heim og skellti mér í jakkaföt. Fór í jarðaför Dóru, ömmu Óla. Á erfinu á eftir vorum við Kjartan og Björn Ingi nánast einu ungu mennirnir í húsinu og við Kjartan hugsanlega þeir einu sem ekki vorum Framsóknarmenn. Athöfnin fór í alla staði vel fram. Ræða séra Þóris var fín. Vissi ekki að Dóra heitin hefði verið svona virk í starfi KR á sínum tíma og komið að byggingu skíðaskálans þeirra.
Stúss og tölvupóstsskrif á safninu seinni partinn. Er ekki sáttur við það hvernig fyrirtækið ætlar að standa að málum ef til kennaraverkfalls kemur. Sendi póst um það á yfirmenn. Ef ég hverf sporlaust, þá vitiði við hverja er að sakast…
Eftir vinnu fór ég ásamt Palla Hilmars að hengja upp plaköt á Háskólasvæðinu fyrir tónleika með harðkjarnasveitinni I adapt. Dagskráin lofar góðu, en ég held ég segi samt pass að þessu sinni.
Handboltaleikur klukkan sjö. FRAM vann stórsigur á KA. Kom flestum áhorfendur þægilega á óvart. Leikstjórnandinn er átján ára, minni en ég og spilar með gleraugu. Gaman að byrja vel.
Fór af vellinum í hálfleik. Óli og Laurence komu í heimsókn og við sátum að spjalli þar til komið var að þriðjudagsfótboltanum í KR-heimilinu. Það voru mikil hlaup, en bakmeiðslin frá því í síðustu viku öngruðu mig ekki að ráði. Sibbi, gamli bekkjarbróðir og nýbakaður pabbi, mætti eftir að hafa verið á fæðingardeildinni síðast. Hann er brattur og skammast sín ekkert fyrir að gangast við úthverfalífsstílnum. Hann býr í Lómasölum. Hvers konar götuheiti er það eiginlega?
* * *
Forsíða DV er um forseta Miðbaugs-Gíneu. Þetta kallar á færslu frá Sverri Jakobssyni.