Á kvöld þeyttist ég á milli staða. Byrjaði í FRAM-heimilinu þar sem ég sá kvennaliðið leika fínan bolta gegn Eyjastúlkum. Fór í byrjun seinni hálfleiks. Þá var jafnt og FRAM óheppið að vera ekki yfir. Sé á Textavarpinu að það entist ekki út leikinn.
Því næst leit ég inn á VG-fundinn á Vesturgötunni. Enginn fagnaði því að borgarstjóri hafi þurft að segja af sér, en ég held að hver einasti maður hafi verið ákvörðuninni sammála. Undarlegt er það með þessa samstarfsflokka VG í R-listanum, hvað þeim er fyrirmunað að leysa nein mál án þess að fara að rífast í fjölmiðlum. Blekið er ekki þornað á uppsagnarbréfi borgarstjóra fyrr en borgarfulltrúi Samfylkingar fer í fjölmiðla og segir að næsti borgarstjóri MUNI KOMA úr röðum borgarfulltrúa, seinna um kvöldið samþykkja Framsóknarmenn ályktun um að hann SKULI EKKI koma þaðan. Hvað með að reyna – þó ekki sé nema einu sinni – að leysa málin öðruvísi en með upphrópunum?
Fótbolti í KR-heimilinu í lokin. Tapaði tveimur aðalleikjunum en fékk smáuppreisn æru í örstuttum lokaleik. Þetta eru miklu betri tímar en á Nesinu forðum.
# # # # # # # # # # # # #
Á Vesturgötunni er uppáhaldsstóllinn minn. Held að ég hafi bloggað um hann áður.
Þetta er ósköp venjulegur stóll, en á stólbakið hefur verið límdur miði: „Þessi stóll á að vera hér!“ Þetta eru frábær skilaboð. Með þessu er tryggt að stóllinn er alltaf á réttum stað, sama hvert hann er fluttur.
# # # # # # # # # # # # #
Tap Tranmere í kvöld tryggir að Luton heldur sex stiga forystu í deildinni. Því fagna allir góðir menn.
Á morgun fer ég á farskóla safnmanna. Það er tilhlökkunarefni. Því miður er farskólinn í Reykjavík í ár, það er ekki eins skemmtilegt og gefandi og þegar haldið er út á land.