Dómsmál í uppsiglingu
Frægasti og besti bloggari landsins varð fyrir líkamsárás í gær. Aðförin var óhemju hrottaleg og ljóst að árásarmaðurinn, Guðbjartur Jón Einarsson hálfþrítugur húsasmiður, hafði ekkert gott í hyggju. Tildrög árásarinnar voru þau að Stefán (það er sérstakt átak í gangi hjá mér um að gera meira af því að tala um sjálfan mig í þriðju persónu) var að spila fótbolta í íþróttahúsinu á Seltjarnarnesi í gærkvöld.
Þegar leikar stóðu sem hæst fékk Stefán sendingu frá samherja þar sem hann var staddur á besta stað rétt fyrir utan vítateig andstæðinganna. Hann hugðist snúa sér í loftinu og negla knettinum í bláhornið og hefði það svo sannarlega orðið glæsimark. Kemur þá ekki þrjóturinn Guðbjartur aðvífandi og setur hné sit í veg fyrir hægri fót Stefáns sem neglir í hnéskelina. Undir venjulegum kringumstæðum hefði hnéskelin látið undan og skúrkurinn fengið makleg málagjöld, en það er til marks um illan ásetning Bjarts að hann var með hlíf á hnénu. Fyrir vikið stóð hann eftir en besti og frægasti bloggarinn engdist um á gólfinu.
Þegar meiðslin voru tekin út seinna um kvöldið kom í ljós að táin við hliðina á hægri-stórutá var stokkbólgin. Við röntgenskoðun á Landsspítalanum kom í ljós að táin er brotin. Ekki vildi læknirinn þó spelka þetta heldur lét nægja að votta mér samúð sína og rukka mig um komugjöld og fyrir myndatökuna. Aðspurður sagðist læknirinn ekki vita til þess að þessi tiltekni hluti mannslíkamans hefði sérstakt nafn. Giskaði á „vísitá“ – en sú ágiskun virkar ótrúverðug.
Enn hefur ekki verið ákveðið hver verða næstu skref í þessu máli. Mikilvægt er að það komi fram að frægasti og besti bloggari landsins ber ekki kala til Bjarts eftir þetta atvik. Markmiðið er ekki að koma fram hefndum, heldur að ná fram réttlæti – milljónum króna í skaðabætur.
Bjartur má því eiga von á að heyra í lögmanni mínum vegna þessa máls. Enn er þó ekki ljóst hver mun sjá um að reka málið fyrir mig. Vonandi mun Óli Jó ekki láta fjölskyldutengslin blinda réttlætiskennd sína og segja sig frá málinu. Glæpamönnum ber að refsa – skiptir engu þótt þeir séu litlu bræður. Ef Ólafur afþakkar málið gæti þetta orðið frumraun Kjartans í réttarsalnum, en hann mun í það minnsta koma að því sem vitni.
Þó besti og frægasti bloggarinn sé ekki löglærður maður sýnist honum nokkuð augljóst út á hvað kröfugerðin í málinu mun ganga. Farið verður fram á skaðabætur og miskabætur vegna líkamlegs og andlegs ofbeldis. Misbeiting líkamsburða kemur einnig til greina sem sakarefni. Eðlilegar bætur liggja væntanlega á bilinu 5-15 milljónir.
Varakrafan væri sú að fá að brjóta tánna á Bjarti.