Eftir því sem ég hugsa meira um þetta hef ég komist að þeirri niðurstöðu að Sendibílabikarkeppni Þrastar (L.D. Vans Trophy) sé nauðaómerkileg. Raunar er bara gott að falla strax úr keppni en að ómaka sig á þessum leiðindum og taka sénsinn á að missa leikmenn í meiðsli.
Sú staðreynd að Luton var kjöldregið gegn Southend í 3ju umferð þessarar keppni í gær hefur þó ekkert með þessa niðurstöðu að gera.
* * *
Valur – Fram í undanúrslitum bikarsins. Tja, verra hefði það getað verið.
* * *
Steinunn er komin í jólafrí, eftir að hafa væntanlega rúllað upp prófinu sínu í morgunn (að venju). Fyndið að fyrir nokkrum vikum þurfti ég að banna henni að segja sig úr kúrsinum, þar sem hún var viss um að lenda í hönk með þetta allt saman.
Seinnipartinn tekur svo við fyrsti aðalstjórnarfundur Steinunnar hjá Öryrkjabandalaginu, þar verður væntanlega engin lognmolla – þökk sé sviksemi helvítis ríkisstjórnarinnar. Ekki amalegt að koma inn þegar allt er á fullu!
Sjálfur stefni ég á að horfa á fótbolta í kvöld hjá Kjartani. Meistaradeildin virðist ætla að vera óvenjuskemmtileg í ár.
* * *
Gærdagurinn var afkastamikill. Sýndi íbúðina mína, en hana hefur enginn skoðað í lengri tíma. (Hver kaupir líka íbúð í desember?) – Á ljós kom að hinn mögulegi kaupandi reyndist náfrændi Bryndísar. Mér er til efs að hægt sé að finna mikið betri meðmæli með nokkrum manni…
Að sýningarstússi loknu leit ég við hjá Val húsfélagsformanni. Horfði á helv. Júnæted kjöldraga arfaslaka Þjóðverja. Drakk jólabjórinn frá Agli. Sá er ekki afleitur.
Loks var farið heim að semja GB-spurningar. Palli leit í heimsókn og ég greip hann glóðvolgann í samningarvinnuna. Þetta flýgur bara áfram…
* * *
Ætli það þurfi nokkuð að benda fólki á þessa mögnuðu færslu Togga? Geri ráð fyrir að annar hver maður hafi nú þegar lesið hana. Minnist þess ekki að hafa farið svo nærri því að brynna músum við blogglestur fyrr.