Það segir sína sögu um hinar frábæru viðtökur Orkujarlsins að eftir fimm umferðir hafa fimm keppendur hlotið stig. En þegar þriðjungur keppninnar er senn að baki hlýtur sú spurning að vakna hvort einhverjum keppanda takist að ná afgerandi forystu. Staðan er:
3 stig Jóhanna Helgadóttir
3 stig Nanna Rögnvaldardóttir
2 stig Örn Úlfar Sævarsson
2 stig Gísli ísgeirsson
1 stig Hilmar Hilmarsson
Hugum þá að sjöttu umferð, fyrstu vísbendingu. Að þessu sinni er spurt um íslenska virkjun.
Byggingartími þessarar virkjunnar var einhver sá lengsti sem þekkst hefur hér á landi, því 32 ár liðu frá því að stöðin var tekin í notkun og þar til búið var að reisa yfir hana stöðvarhús. Ekki stóðu þó yfir framkvæmdir allan þennan tíma, því lengst af voru vélar stöðvarinnar einfaldlega keyrðar undir beru lofti.
Hver er virkjunin?