Egill Helgason segist ekki vera bloggari. Rök hans eru þessi: Sögu mína á internetinu má rekja til 1. febrúar árið 2000, sem er sirka fimm árum áður en bloggið var fundið upp. Þar af leiðandi get ég ekki verið bloggari.
Þessi röksemdafærsla er ágæt eins langt og hún nær, en skapar önnur skilgreiningavandamál.
Sjálfur byrjaði ég að blogga í mars 2002 og skilgreindi skrifin mín frá upphafi sem blogg. Ég hafði lúslesið íslenskar bloggsíður veturinn 2000-2001, þegar ég var úti í námi. Á ársbyrjun 2000 sat ég námskeið í Háskólanum ásamt Björgvini Inga, sem ég hef kallað föður bloggsins á Íslandi. Hann hafði bloggað um nokkurra mánaða skeið og var farinn að vekja talsverða athygli innan þröngs hóps. Ég minnist þess hvað Björgvin var ánægður með að Egill væri byrjaður að blogga – þar sem íslenska bloggsamfélagið vantaði e-a þjóðkunna einstaklinga til að kynna fyrirbærið betur.
Þá er spurningin: ef bloggið var ekki fundið upp fyrr en fyrir svona tveimur árum, hvern fjandann var ég þá að gera fyrir tæpum fimm árum árum og Björgvin Ingi fyrir rúmum sjö árum? Við hljótum því að teljast forsögulegir bloggarar.
Varðandi spurninguna um hvað sé blogg og hvað sé ekki blogg tel ég að vænlegast sé að grípa til fílaprófsins: Ef það lyktar eins og fíll og lítur út eins og fíll – þá er það fíll.
# # # # # # # # # # # # # #
Markmiðssetning fyrir árið:
i) Vinna kosningar í vor
ii) Koma garðinum á Mánagötunni í skikkanlegra horf
iii) Knésetja helv. Moggabloggið