Er fyrsti desember ennþá frídagur í skólum? Það var alltaf frí á fullveldisdaginn þegar ég var pjakkur og ef ég man rétt hélst það upp grunn- og framhaldsskólann. Á háskólanum var staða fyrsta desember nokkuð óráðin. Liðið sem hékk í kringum stúdentapólitíkina var skikkað til að mæta á e-a samkomu, en aðrir lásu fyrir próf. Man ekki hvort dagurinn átti að heita almennur kennslu- og prófadagur eða ekki.
Fullveldisdagurinn hefur haft sérstaka stöðu í fjölskyldunni. Afi heitinn átti afmæli fyrsta desember og þetta var líka brúðkaupsdagur þeirra ömmu. Á Neshaganum var alltaf kaffiboð af þessu tilefni á fyrsta des. Það var ekki vandræðalaus dagsetning, því í gestahópnum var slatti af kennurum og glás af skólabörnum sem voru á kafi í prófaundirbúningi.
Eftir að afi dó, hefur verið reynt að viðhalda þeirri hefð að fjölskyldan komi saman á fyrsta desember. Að þessu sinni var þó fallið frá því, þar sem heilsufar gömlu konunnar býður ekki upp á slíkt. Hún er rúmliggjandi og sterkum deyfandi lyfjum eftir að hafa fallið og beinbrotnað í haust. ístandið er mismunandi dag frá degi, en þegar við heimsóttum hana í gær upp í Borgarnes er ég ekki viss um að hún hafi almennilega tekið eftir okkur.
Þetta verður skrítinn fullveldisdagur án kaffiboðs með upprúlluðum pönnukökum.