Fréttablaðið upplýsir í dag að Anna Kristín Jóinsdóttir verði næsti dómari í Gettu betur. Ég er hæstánægður að botn sé fenginn í málið, enda veitir spurningahöfundi ekki af góðum tíma til að semja öll þessi ósköp – hvað þá í fyrsta skiptið.
Síðustu þrjá miðvikudaga hefur Anna Kristín keppt í spurningaleik Ólafs Bjarna Guðnasonar á Talstöðinni. Fyrst lagði hún Kötu Jakobs að velli, en því næst fréttakonurnar Þóru Arnórs og Evu Bergþóru.
Ef marka má þessar keppnir, sem ég heyrði ýmist að hluta eða í heild sinni, mættu framhaldsskólaliðin búa sig undir bókmenntaspurningar á næsta ári, íslenskar jafnt sem erlendar. Sjálfur hlífði ég liðunum að mestu við íslenskum skáldsögum – ekki vegna þess að ég teldi það slæmt spurningaefni, heldur vegna þess að ég hef ekki lesið nógu mikið af þeim sjálfur.
Með öðrum orðum: gb-nördarnir sem lesið þessa síðu – nú er um að gera að taka sig á í bókmenntunum, læra helstu einkenni sem flestra íslenskra samtímahöfunda og skerpa á erlendu bókmenntasögunni!
Og ef Anna Kristín rambar hingað inn – notaðu sumarið til að semja nógu helv. mikinn stafla af hraðaspurningum. Þó þær séu léttastar í samningu er best að byrja á þeim, því það er svo sálrænt gott að geta byrjað hratt. Hraðaspurningum má svo síðar hæglega breyta í stærri spurningar.
Sömuleiðis er rétt að gæta sín á því að víxlspurningarnar í útvarpinu eru þær vanþakklátustu í allri keppninni. Þær taka lengstan tíma í samningu, en fara svo oft fyrir lítið vegna þess að sum liðin í útvarpinu eru mjög slök og viðureignirnar oftar en ekki lausar við alla spennu. Ekki fórna flottustu spurningunum í útvarpinu, nema um þeim mun meiri stórleik sé að ræða. Á útvarpskeppninni á fyrst og fremst að reyna á undirstöðuþekkingu liðanna. Þar á að spyrja um þingmenn, þjóðarleiðtoga, höfuðborgir, lykilatriði úr mannkynssögunni, íþróttamenn ársins, höfunda jólabóka og ættir dýra. Dýpri þekkingaratriðin eiga að koma inn í sjónvarpinu.
# # # # # # # # # # # # #
Rumskaði um sexleytið og fékk staðfestingu á því sem mig hefur grunað – barnið hrýtur. Raunar hrýtur stelpan lygilega hátt fyrir tíu vikna grísling. Hvernig verður þetta þegar hún stækkar og þyngist?
Þessar hrotur munu ekki trufla mig, enda sef ég þrátt fyrir múrbrot og malbiksfræsingar. Verra með Steinunni, sem þarf á hverri nóttu að sparka í síðuna á mér þegar hrossabrestirnir í mér halda fyrir henni vöku. Hún mun hins vegar tæplega kunna við að hrista Ólínu jafn óþyrmilega til.
# # # # # # # # # # # # #
Á morgun fékk ég símtal með mjög jákvæðum fréttum. Ef þær ganga eftir, sem ætti að koma í ljós strax eftir helgi, taka senn við afar spennandi tímar.