Klúður! Fyrir lifandis löngu var ákveðið að auglýsa opið hús í Rafheimum laugardaginn 6. ágúst, þar sem foreldrar gætu komið og kennt gríslingunum sínum allt um rafmagnið. Þetta hljómaði eins og ágætis hugmynd á sínum tíma, enda var enginn búinn að líta á dagatalið.
Á laugardaginn kemur verður sem sagt Gay Pride í miðborginni og milljón, skrilljón manns. Á Elliðaárdalnum verður hins vegar væntanlega ekki kjaftur. Bömmer!
Kannski ætti safnið að koma með krók á móti bragði og leggja sérstaka áherslu á að höfða til hómófóbískra? Engir hommar í Rafheimum! Vertu ekki hýr – komdu til okkar! Veit ekki hvort slíkar auglýsingar samrýmist alveg stefnu Orkuveitunnar um vera góður þjóðfélagsþegn og berjast gegn fordómum…